Kreu i PDK-së, Nard Ndoka, duke komentuar krizën politike në vend, ka hedhur sërish akuza të fotrta në drejtim të kryeministrit Edi Rama.
I ftuar në Syri.net, Ndoka tha se klasa politike shqiptare duhet të ndihet fajtore që lejoi Ramën të katandisë vendin në këtë gjendje.
‘Përpara kishte një imazh të krijuar në mënyrë artificiale. Jo vetëm që e provuan por u zhgënjyen dhe u tejngopën. Prandaj kërkohet largimi i tij. Ka humbur shpresat, ka sjellë një pasiguri. Por ajo që nuk i falim është humbja e shpresës te shqiptarët. Ndjehemi fajtorë që nuk e parandaluam më parë, jo sot’, tha Ndoka.
I pyetur nëse ndjehet përgjegjës që dikur ka bashkëpunuar me kryeministrin aktual, Ndoka u shpreh se ka bashkëpunuar me të vetëm në opozitë, kur kërkohej mbrojtja e votës.
‘Unë për fatin e mirë nuk kam qenë kurrë në pushtet me Ramën. Në opozitë ishim bashkë për shkak të votës dhe sistemit zgjedhor, por ai nuk i qëndroi kurrë korrekt marrëveshjes’, shtoi kreu i PDK-së.
