Sipas deputetit Fatmir Guda, i cili u propozua nga KQZ për tu bërë pjesë e Parlamentit, për përfaqësimin qarkut të Korçës ka bërë me dije vendimin e tij për të mos pranuar këtë propozim.
Përmes një statusi në rrjetet sociale ai ka pranuar gjithashtu se drejt tij janë bërë edhe shumë kërcënime dhe presione per ta pranuar këtë post por që ai nuk është lëkundur në asnjë moment nga vendimi i tij.
Statusi i tij
ËSHTË NDER DHE PRIVILEGJ TË QËNËT PJESË E PARLAMENTIT TË VËNDIT TËND, TË PËRFAQËSOSH DHE MBROSH ATJE INTERESAT E QYTETARËVE TË TU!
Por ja, që kushtet në të cilat më ofrohet marrja e mandatit të deputetit për të qenë pjesë e tij janë krejtësisht larg normalitetit, pasi institucioni bazë i demokracisë gjendet në krizën e tij më të thellë të përfaqësimit, për shkaqe të njohura botërisht, që nga përfshirja në të e elementëve të botës së krimit dhe deri tek përdorimi i tij në mënyrë autoritariste për uzurpimin në një dorë të vetme të të gjitha pushteteve. Është një parlament i dalë nga lekët e krimit dhe për t’i shërbyer vetëm krimit.
Është kjo situatë që dhe u ka diktuar partive opozitare vendimmarrjen politike më të paprecedentë , siç është akti ekstrem i djegies në grup të mandateve parlamentare.
Pa dashur të abuzoj e ta bëj edhe më qesharak termin “u konsultova me ndërkombëtarët”, ju bëj me dije, se përveç leximit qartë të verdiktit unanim të strukturave drejtuese të PD dhe opozitës së bashkuar, të vetmit me të cilët mbartja detyrimin për tu konsultuar ishin ata që më kanë mbështetur në të gjitha sfidat e mia politike, sikundër edhe gjatë fushatës elektorale të 2017, të cilët më kërkuan të mos dilja jashtë vullnetit politik të subjektit që unë përfaqësoj.
Edhe pse e gjykuam se parlamenti ishte vendi dhe rasti i duhur për të ngritur me forcën e arsyes një nga çështjet më me rëndësi siç është korrigjimi i hartës territoriale administrative, konkluduam se ky institucion tashmë e ka humbur legjitimitetin dhe moralin me një mungesë të shprehur të dëshirës për të dëgjuar zërin opozitar dhe emergjencë kombëtare është zëvendësimi sa më herët me një kuvend shqiptarësh të dalë nga vullneti i lirë i qytetarëve.
Ja përse asnjë lloj tundimi, presioni apo shantazhi i pamunguar i këtyre ditëve s’më ka dyzuar aspak ta refuzoj prerazi mandatin e ardhur antikushtetuetshmërisht, duke shpresuar shumë, se me këtë akt nuk do jem i vetmi që do i vij sado pak në ndihmë dhe një sahat e më parë zgjidhjes së krizës politike në vend.
Dhe së fundi, pa dashur aspak t’ju lë shijen e një “skllavi” apo “heroi” partiak dua tu bëj me dije se,
ME QINDRA HERË TË TJERA TË MË OFROHEJ NJË MUNDËSI E TILLË, NË TË TILLA RRETHANA, PA U MENDUAR DY HERË, PO NJËLLOJ DO TA REFUZOJA.
Aspak i lumtur për katandinë e mexhlisit të popullit tim, edhe unë kam zgjedhur të rri me qytetarët dhe s’do të rresht së kontribuari dhe luturi në zot, që Shqipëria jonë ti rikthehet stabilitetit dhe vlerave të demokracisë evropiane!
