Shkrimtari i njohur Rudi Erebara, i cili është dhe një nga aktivistët më në zë për Mbrojtjen e Teatrit, ka bërë një shkrim sot një vit pas nisjes së betejës heroike të artistëve dhe qytetarëve, për të ndaluar dyshen Rama-Veliaj të shkatërrojnë Teatrin Kombëtar.
Përmes një postimi në Facebook, Erebara shkruan se nuk mund të ketë zgjedhje me këtë qeveri barbare e cila shkatërroi gjithçka.
Ja çfarë shkruan Erebara:
Kemi një vit që mbrojmë teatrin dhe një vit më parë, si dje një vit fiks, ishte Dita Ndërkombëtare e Teatrit. Atë ditë unë kërkova të kishim mbështetjen e Partisë Demokratike nga z. Berisha dhe nga z. Basha, dhe sot e kemi dhe jemi të gjithë bashkë kundër diktaturës. Një vit më parë na quajtën shpellarë ne që mbrojmë Teatrin. Barbarët që duan të shkatërrojnë dhe kanë kanë shkatërruar çdo gjë që kishte kujtesë në këtë qytet dhe në të gjithë Shqipërinë. Barbarët që shkatërruan sheshin “Skënderbej” dhe bënë kodra e fusha.
Barbarët që nuk kanë lënë vend pa mbjellë kulla. Barbarët që kanë mbyllur të gjitha institucionet e artit me kryeministrin piktor. Barbarët që shkatërruan çdo strukturë juridike ku ne mund të drejtoheshim, të zgjidhnim problemin tonë të Teatrit. Ky Parlament për turp votoi dy herë një ligj special për të shembur historinë e këtij vendi. Ku parlament nuk ekziston më. E mbështes plotësisht qëndrimin tim si shkrimtar dhe qytetar, qëndrimin e opozitës që nuk ka zgjedhje me këtë qeveri. Rama ik!’ shkruan Erebara.
