Nga Boldnews.al
Në një fjalim të rrëmujshëm, të shoqëruar me diksion “british”, zëvendësministri me autorizim ministri, lajmëroi se 20 diplomatë në vende të ndryshme të botës do të shkarkohen, ose lëvizin nga pozicionet që kanë.
Këtë e argumentoi me frymën e re që po sjell ky 28-vjeçar, e sidomos nga vizioni i Edi Ramës, që sipas Cakajt kërkon përfaqësim dinjitoz të diplomatëve tanë në arenën ndërkombëtare.
Po më shumë se kjo shkundje, vlen një listë e dalë po nga vetë Ministria e Jashtme, mes të cilëve janë diplomatë “karriere”, vlera e së cilëve lidhet kryesisht me të afërmit dhe familjarët që bëjnë politikën mediatike dhe politike në vend.
Emrat e përfolur për tu larguar janë: Majlinda Dodaj, motra e Aleksandër Frangajt, pronar i TV Klan, diplomate në Ambasadën e Shqipërisë në Vatikan; Gerarta Ballo, vajza e Artur Zhejit, gazetar dhe drejtues i emisionit ‘360 gradë’, diplomate në Ambasadën e Shqipërisë në Itali; Alket Çani, vëllai i Arjan Çanit, gazetar dhe drejtues i emisionit ‘Zonë e Lirë’, diplomat në Ambasadën e Shqipërisë në Francë; Inid Milo, vajza e Paskal Milos, ish-ministër i Jashtëm, drejtuese e Drejtorisë së NATO-s pranë Ministrisë së Jashtme të Shqipërisë.
Ata janë aty prej dekadash. Çdo qeveri që ikën e vjen nuk i prek, për aq kohë sa babai, vëllai, apo miku është në botën mediatike, të biznesit apo klientelizmit të ulët.
Nuk është rastësi që Rama dhe Cakaj e kanë nxjerrë këtë listë me dëshirë, më shumë për të shkaktuar shkëputje vëmendje ndaj problematikës që po kalon Shqipëria.
Rama dhe i vogli Cakaj, po mundohen të kapin ndjesinë publike, që me të drejtë do të thonë: “Shumë mirë ua bën që i shkarkon, ata janë aty si të afërm të bosëve mediatik dhe klientelizmit politik”. Pikërisht për këtë ka nevojë Rama, që t’i veshë vetes një aureolë që kurrë nuk e ka pasur dhe as do e ketë.
Njëkohësisht me prekjen e “zemrave qytetare”, ka për qëllim që këtyre personazheve mediatik e politik tu ushtrojë presion, që të ndërrojnë pllakë, të bëhen vasalë të qeverisjes, të mendohen dy herë para se të kritikojnë Ramën.
Dhe ata kanë treguar se për interesa të ngushta dinë të kthejnë pllakën e qëndrimeve, vetëm me një urdhër. Vajza, motra, vallëai, kunata, apo krushqia e afërt dhe e largët do vijojnë të jenë në diplomaci. Emrat kanë dalë vetëm si formë presioni dhe krijimi të një tymnaje në publik, për ti rritur kredo kreut të qeverisë dhe aspak ministrit, që pas tre muajsh nën drejtimin e Ministrisë së Jashtme nuk po e kupton rolin që ka.
Fëmijët, familjarët dhe të afërmit e politikanëve, bosëve të medias, aopo opionkrijuesve janë punësuar në diplomaci, pranë Bankës së Shqipërisë, apo në Autoritetin e Aviacionit Civil. Janë tre sektorë që paguhen mirë, aty ka mundësi të bëhet karrierë, lëvizin me targa diplomatike, duke ua ngritur traun kudo, bëjnë jetë moderne dhe gjezdisin botën.
Janë të shkëputur totalisht nga realiteti që kalon vendi. Kjo është bota e ndarë e ta pasurve, aoligarkisë dhe opionbërësve, qëllimin e së cilës kanë të përfitojnë nga të mirat e pushtetit, cilido qoftë ai.
