“E vrava se rashë në dashuri me vajzën që ai e shfrytëzonte si prostitutë dhe nuk e linte të lirë”. Dëshmia është e të penduarit Giovanni Cascarino, në procesin gjyqësor të vrasjes së Halim Margiekait, 20 vite më parë në Capua. Shqiptari u ekzekutua me pistoletë në një atentat, ku mbeti i plagosur edhe i vëllai.
Giovanni Cascarino ka treguar në gjykatën e Apelit krimin e vitit 1999, duke zbuluar edhe emrin e bashkëpunëtorit, Mario Cuoco. Të dy italianët, siç raportojnë mediat lokale, kanë qenë të lidhur me klanin mafioz të Camorra-s, “La Torre”.
Prokurori, pasi dëgjoi rrëfimin, kërkoi dënimin me 18 vite burgim për Giovanni Cascarino-n, autori i vrasjes dhe 16 vite burg për Mario Cuoco-n, si bashkëpunëtor në krim.
Të dy u liruan në shkallë të parë për mungesë provash, por vendimi u ankimua dhe u vendos rishqyrtimi i çështjes në Apel. Në këtë pikë, Giovanni Cascarino kërkoi të bashkëpunojë me drejtësinë dhe pranoi vrasjen, duke marrë statusin e të pandehurit.
Ai tha se ra në dashuri me një vajë të quajtur Sonia, që detyrohet të prostituohej në afërsi të Capua-s. Me të, kishte krijuar një lidhje dashurore, por Halim Margiekai, tutori i vajzës, nuk kishte ndërmend ta linte të lirë, dhe bashkë me të vëllanë e rrëmbyen dhe e keqtrajtuan për disa muaj, vijon rrëfimi. Italiani tregoi se për këtë motiv, vendosi të hakmerrej ndaj dy vëllezërve shqiptarë. Atentati ndodhi më 17 shtator 1999 në Capua. Halim Margiekai mbeti i vdekur, ndërsa i vëllai u plagos.
Vendimi i gjykatës pritet të jepet muajt në vijim. /Boldnews.al/
