Tirana do të përbal let brenda katër ditësh dy herë me Laçin, për kampionat dhe Kupë. Jo vetëm kaq, pasi kjo është java finale për bardheblutë dhe skuadrat e tjera të Superiores që të dorëzojnë në federatë dokumentacionin e plotë për kriterin e fundit në lidhje me licencimin për pjesëmarrje në Kupat e Europës: atë financiar.
JAVA FINALE – Për skuadrën më të titulluar në Shqipëri, kjo javë mund t’i vendosë lidhjen me Europën pas përfundimit të sezonit. E thënë më shkoqur, përballja me Laçin në fundjavë është e tillë që u mundëson të besuarve të Memës ecurinë e qetë larg zhurmës së fundklasifikimit në rast fitoreje ditën e shtunë.
Me një rezultat pozitiv, presioni do të largohej drejt ekipeve të tjera që rrezikojnë në zonën e ftohtë. Në të kundërt? Luftëtari është vetëm dy pikë larg. Ndaj, çdo hap fals deri në fund mund ta vendosë Tiranën në pozita të vështira, në rast se shoqërohet edhe me fitore të Kastriotit. Në aspektin sportiv, rezultatet e Tiranës kanë qenë pozitive në vitin kalendarik 2019, ndaj edhe ecuria në Kupën e Shqipërisë mund të jetë… shpërblimi.
Fitorja 3-0 në ndeshjen e parë ndaj Laçit në turin çerekfinal mund të konkludohet në kualifikim, në rast se nuk do të ketë ndonjë surprizë të çmendur në ndeshjen e kthimit. Më tej, dy sfida dhe një finale, janë rrugëtim i njohur për skuadrën më të titulluar në Shqipëri, që do të shtonte një tjetër trofe në palmares, 50 milionë lekë (të vjetër) nga shpërblimi i federatës si fituese e Kupës dhe mbi të gjitha… biletën për në Kupat e Europës.
