Ervin Bejleri, i njohur nga të gjithë si Vini në rolin e tij në “Portokalli”, është pjesë e kastit të filmit komedi “Dy Gisht Mjaltë”, që pritet të dalë nesër në kinema.
E megjithatë deklarata e tij mbi filmin, të cilin e quajti komercial, la pak shije të keqe kur aktori tha se është një film për të bërë lekë.
I ftuar në emisionin “Rreze Dielli” në “Report Tv” pak ditë më parë, Ervini u shpreh se populli ka nevojë për filma të tillë:
“Është një film komercial, është një film për të bërë lekë. Vlera artistike?! Nuk e kam parë ende. Stafi ishte shumë korrekt, si ai teknik, si ai produksional. Është një film komercial, për të bërë lekë, por që për mua këta filma duhet të prodhohen pse jo? Ka nevojë populli, ka nevojë publiku. Italianët ka vite që bëjnë këto lloj filmash”.
“Dy Gisht Mjaltë” është shkruar nga Ermal Mamaqi dhe Besnik Mustafaj, ndërsa regjisor i filmit është regjisori turk Emir Khalilzadeh. Për të folur për të një ditë para premierës, ishte sot i ftuar Ermal Mamaqi në emisionin “Wake Up”, ku u pyet edhe për deklaratën e mikut të tij.
Ermali tha se nuk ishte në dijeni të deklaratës së Ervinit, por shtoi se nuk e ka thënë me të keq, pasi fjala “komercial” shpesh herë duket si një gjë e keqe:
“Ervini është një djalë shumë i mirë, shumë i talentuar dhe shok i vjetër që nga Portokallia. Nuk e besoj ta ketë thënë me të keq. Fjala ‘komercial’ në shumë raste duket si diçka e keqe, ka krijuar një lloj imazhi të keq të gjërave që shiten. Kur gjërat shiten u humbet vlera se njerëzit thonë ‘hë se kjo shitet, është komerciale’. Por kjo s’do të thotë se gjërat komerciale nuk kanë vlera”.
Premiera e filmit do të jepet nesër. Në role të tjera të këtij filmi do të jenë edhe aktorë të njohur si: Koço Devole, Marjana Kondi, Bujar Asqeriu, Natasha Sela, Olta Daku, Ervin Doko, Eglein Laknori, Blerim Destani etj.
