Elisa Spiropali ka vendosur tu tregojë shqiptarëve se sa mirë i njeh ajo shkrimtarët botërorë dhe vendas si dhe veprat e personazhet brenda tyre, edhe pse gafat e saj janë të pafundme.
Elisa që krahasoi kryeministrin Edi Rama me figurën e heroit tonë kombëtar, Elisa që e bëri Servantesin shqiptar, sot ka sulmuar kreun e opozitës Lulzim Basha, me Sokratin e Greqisë dhe Migjenin e Shqipërisë.
Pak pas daljes së kreut të opozitës Lulzim Basha nga prokuroria ku u mor në pyetje për lobimin e PD në SHBA për 650 mijë dollarë, ka ardhur edhe reagimi i Spiropalit, e cila i është hakërryer kreut të opozitës me veprat e Migjenit dhe Sokratin e Greqisë.
“Lulzim Basha gënjen si derri i knaqun i Migjenit sapo del nga dera e Prokurorisë. Pastaj kur Prokuroria i’a nxjerr në shesh gënjeshtrat, bën Sokratin e përvuejtun si i persekutuar politik. Është koha të përgjigjesh Lulzim. As Derri as Sokrati s’të ndihmojnë dot!,”-shkruan Spiropali në Tëitter.
Nga ana e qeverisë ka reaguar edhe Taulant Balla i cili tha se kryedemokrati Basha gënjeu sapo doli nga dera e Prokurorisë.
Hetimet për lobimin e bërë nga PD nisën pas ardhjes së dy letërporosive nga SHBA dhe Skocia, ku PD pretendohet se ka paguar 525 mijë dollarë tek kompania Stotington Strategies, ndërsa kompania Biniatta Trade 150 mijë dollar.
Më 14 nëntor të 2017, “Stonington Strategies” raportoi në Departamentin e Drejtësisë pagesat e bëra nga PD, të cilat nuk janë deklaruar në raportin financiar që është depozituar në KQZ në zgjedhjet e vitit 2017. Partia Socialiste, ndërkohë e ka akuzuar PD dhe kryetarin Lulzim Basha se janë të lidhur me rusët, pasi, kompania Biniatta Trade, është pjesë e një zinxhiri kompanish që janë të regjistruara në Belizë, një vend i njohur si parajsë fiskale.
