Një tjetër takim për reformën në drejtësi. Dy ambasadorët, ai i SHBA-ve Donald Lu dhe ajo e BE-së, Romana Vlahutin po zhvillojnë një takim me kryeministrin Edi Rama në kryeministri. Takimi erdhi menjëherë pas takimit të dy aleatëve Meta-Rama për reformën në drejtësi.
Takimet janë në kuadër të përshpejtimit të procesit për miratimin e reformës në drejtësi. Kryeministri Edi Rama edhe kreu i Kuvendit kanë deklaruar se koha nuk pret për miratimin e saj, por drafti i Reformës në Drejtësi nuk është futur në kalendarin 3-javor të punimeve të Kuvendit.
Po sot kryeparlamentari Ilir Meta pati një takim me kryeministrin Rama, i shoqëruar edhe nga nënkryetari i LSI-së Petrit Vasili, ministri Ylli Manjani dhe Sokol Dervishaj. Takimi ka zgjatur rreth 1 orë e gjysmë.
Dje Meta takoi edhe kreun e PD-së, Lulzim Basha. Mësohet se Basha është shprehur që opozita ka kërkuar vetëm aplikimin e formulës së “vendeve të rezervuara” që i është propozuar nga EURALIUS dhe Komisioni i Venecias në Opinionin Përfundimtar.
