Duket se nuk paskan të sosur indianët që kanë gjetur strehë e terren në Shqipëri për të vënë në jetë skemat e tyre të pastrimit të parave…
Pas vëllezërve indianë Nitin Sandesara dhe Chetankumar Sandesara, të kërkuar në të gjithë botën për pastrim parash në vlerën 725 mln dollarë të cilët erdhën në Shqipëri, u bënë ndërtues dhe morën nënshtetësinë shqiptare, del në skenë një tjetër emër.
Bëhet fjalë për Hitesh Patel, kunatin e vëllezërve Sandesara, i akuzuar për mashtrime bankare nga grupi Sterling Biotech. Indiani Patel, është arrestuar në Rinas, në bazë të një urdhri të Interpol.
“Arrestohet provizorisht një shtetas indian i shpallur në kërkim ndërkombëtar për pastrim parash, me qëllim ekstradimi drejt Indisë. Interpol Tirana në bashkëpunim me shërbimet e Policisë Rinas arrestuan provizorisht shtetasin indian: H. P., 59 vjeç, lindur në Indi dhe banues në Nigeri Ky shtetas është kapur në në aeroportin e Rinasit në dalje nga territori i Republikës së Shqipërisë pasi ishte person i shpallur në kërkim ndërkombëtar nga Interpol New Delhi/ Indi. Gjykata Patiala House/New Delhi, ka lëshuar ndaj këtij shtetasi urdhër arresti për veprën penale ‘Pastrimi i parave’, parashikuar nga nenet 3 dhe 4 të “Ligjit për Parandalimin e Pastrimit të Parave’. Veprimet e mëtejshme për ekstradimin e këtij shtetasi do të kryhen nga ZQK Interpol Tirana”, njoftoi Policia.
Patel është një nga të akuzuarit kryesorë në këtë skandal dhe është kunati i vëllezërive Sandesara, Nitin dhe Chetan Sandesara. Tashmë pritet të ekstradohet shpejt në Indi. Drejtoria e Zbatimit të Ligjit kishte marrë ‘alarmin e kuq’ nga Interpoli më datë 11 mars për kunatin e vëllezërve Sandesara. Patel ishte një instrument për vendosjen e drejtorëve kukulla në kompanitë guacka (fantazmë) qe përdoreshin nga Sandesaras. /BN/
