Fitorja me Kukësin ishte pika e kthesës për Skënderbeun pas atij barazimi në Durrës. I këtij mendimi është edhe kapiteni i Skënderbeut Marko Radas, i cili në një prononcim të dhënë për “Panorama Sport”, thekson se kjo fitore, por edhe zhvillimet e javës që lamë pas ka shkundur ekipin duke e kthyer në ritmin e duhur.
Për kapitenin bardhekuq e rëndësishme është ruajtja e ecurisë dhe rikuperimi i energjive për të bërë një fund kampionati perfekt. Ai kërkon Europën, pavarësisht se zyrtarisht nuk ka një konfirmim për prezencën e tyre. Nga ana tjetër, numri 33 i Skënderbeut flet edhe për nënshtetësinë shqiptare që mbetet në pritje për të mbyllur gjithçka.
Katër pikë në dy ndeshje, nuk kishte ndodhur prej shumë javësh te Skënderbeu. Kjo tregon se jeni rikthyer?
Po besoj se po, është një tregues i qartë se jemi në rrugën e duhur dhe duhet të vazhdojmë kështu. Ajo që më bën të besoj më shumë në forcën tonë është fakti se kemi ditur të përmbysim një disavantazh prej dy golash në Durrës, ndërsa tani arritëm të merrnim një fitore të rëndësishme për Europën përballë Kukësit. Mendoj se erdhi koha e bukur për Skënderbeun.
Thatë fitore për Europën, ai është objektivi juaj?
Po normal ky është objektivi ynë për këtë sezon, pasi të flasësh për titull në këto momente besoj se është pak e ekzagjeruar. Kështu që le të përqendrohemi tek Europa fillimisht dhe më pas me kalimin e javëve të shohim se çfarë do të na dalë përpara.
Çfarë po bëhet me pasaportën shqiptare për ju?
Jemi në fazat e fundit. Kam edhe disa dokumente për mua dhe nusen që duhet t’i marr në Kroaci dhe më pas nga ana ime është gjithçka gati. Mbeten vetëm procedurat shqiptare për t’u mbyllur si çështje. Besoj se shumë shpejt mbyllet gjithçka.
Si ndihet Radas mes Shqipërisë dhe Kroacisë?
Tani është normale që zemra ime është kroate dhe normalisht jam kroat në shpirt, por një pjesë e saj tashmë flet edhe shqip. Do të jetë diçka e bukur, pasi e kam pranuar me dëshirën më të madhe të pajisem me pasaportë shqiptare./Panorama Sport
