Kongresi i Partisë Socialiste do të zhvillohet më 23 mars, duke nisur nga ora 10:00, në Pallatin e Kongreseve. Burime nga Kryesia e PS-së, e cila u mblodh sot për të diskutuar mbi punimet e Kongresit, bëjnë të ditur se ai do të jetë i ndarë në tri sesione të ndryshme.
Shembujt e qeverisjes lokale të PS-së, platforma e “Bashkëqeverisjes”, si dhe “Pakti për Universitetin” janë 3 shtyllat e Kongresit.
Në të, fjalën kryesore do ta mbajë kryeministri Edi Rama, më pas do të ketë fjalime nga disa prej ministrave dhe disa kryebashkiakë, edhe pse nuk priten të shpallen kandidatët socialistë për zgjedhjet lokale të qershorit të këtij viti.
Kryeministri Rama kërkoi pjesëmarrje maksimale në Kongres pa mungesa. Ai u shpreh se seanca parlamentare do vijojë normalisht dhe u kërkoi që të gjithë deputetët të mbajnë fjalime. Gjithashtu Rama u kërkoi socialistëve të dalin në terren për të diskutuar për kandidatët për Këshillat bashkiakë. Kryesia e PS ngarkoi Damian Gjiknuri Sekretar të Çështjeve Zgjedhore. Gjiknuri do koordinojë dhe punën për reformën zgjedhore.
Mësohet se ftesa për pjesëmarrje në Kongres i është dërguar të gjithë kryetarëve socialistë ndër vite, përfshi edhe Fatos Nanon. Në Kongres, fokusi i diskutimeve do të jetë te zgjedhjet lokale, teksa pritet të shpallet lista e këshilltarëve bashkiakë vetëm për kryeqytetin.
