Zyra e Propagandës e Bashkisë së Tiranës është bërë “lëmsh” me datën e organizimit të aktiviteteve për ‘Ditën e Verës”.
Pasi dëgjoi “zërin e qytetarëve”, Erion Veliaj vendosi të shtyjë me tre ditë organizimet festive, nga data 14 Mars në datën 17 Mars, një ditë pas protestës së opozitës.
Por, sipas posterit zyrtar, të shpërndarë nga Bashkia e Tiranës në rrjete sociale dhe në ambjente të dukshme publike, “Dita e Verës” do të zhvillohet në datë….17 Shkurt.
Në posterin zyrtar, Bashkia e Tiranës njofton: “Ke nostalgji për lojërat popullore? Sfido miqtë, dhe eja më 17 Shkurt…”.
Festimet e “Ditës së Verës” në Tiranë u shndërruan në një objekt ironie kundër kryebashkiakut Veliaj. Ai vendosi ta shtyjë ditën e festës zyrtare, me justifikimin zyrtar se “do të binte shi dhe njerëzit nuk do të kënaqeshin aq sa duhet”.
Natyrisht, të gjithë e kanë të qartë se ‘Dita e Verës” në Tiranë do të zhvillohet një ditë pas protestës së paralajmëruar të opozitës. Me këtë mjet propagandistik, Lali Eri synon të dëshmojë se qytetarët nuk janë për zhvillimin e protestave, por për takime festive.
