Pak minuta më parë, në Nion të Zvicrës u hodh shorti për çerekfinalet dhe gjysmëfinalet e Ligës së Kampionëve dhe gogla ishin të pamëshirshme për Mançester Junajtidin dhe Barcelonën që do të përballen mes tyre në çerekfinale. Përballje të tilla në këtë pikë të Championsit, nuk kanë ndodhur shpesh duke qenë se fati i ka përballur më shumë në finale.
Ndeshja e parë e luajtur në një përballje me eliminim direkt (përveç finaleve) ka qenë në sezonin 1983-84, ku ‘Djajtë e kuq’ fitonin në shtëpi me rezultatin 2-0, ndërkohë që katalanasit bënin përmbysjen e madhe në Spanjë, duke fituar 3-0. Hera e dytë ka qenë në sezonin 2007-08, ku takimi në Spanjë mbyllej barazim pa gola 0-0, ndërkohë që në Angli fitonin ‘Djajtë e kuq’ me rezultatin 1-0 duke kaluar në finale ku edhe fitonte Champions ndaj Çelsit.
Interesant është fakti se asnjëra nga skuadrat nuk ka arritur që të marrë fitore në fushë kundërshtare, duke qenë se si Barcelona, ashtu edhe Mançester Junajtidi numërojnë vetëm 2 humbje dhe 2 barazime në transferta ndaj njëra tjetrës. Në finalen e Ligës së Kampionëve, janë përballur dy herë ku në të dyja rastet ka fituar Barcelona dhe në të dyja rastet, Mesi ka arritur të shënojë. Pavarësisht se goglat rezervuan ndeshjen e parë në Spanjë, në fakt ndeshja e parë do të luhet në Angli për shkak se në të njëjtën ditë luan edhe Mançester Siti.
