Një aksident automobilistik ka ndodhur në aksin rrugor Tiranë – Elbasan në rrugën e vjetër pranë kthesës së Sallakut, ku është përfshirë një automjet i Gardës së Republikës.
Sipas informacioneve nga vendngjarja, furgoni me të cilin udhëtonin efektivë të Gardës u përplas me një makinë tjetër tip Mercedes-Benz. Të njëjtat burime sqarojnë se gardistët po udhëtonin drejt Elbasanit për të marrë masa sipas rregullores, pasi qeveria do të udhëtojë drejt Elbasanit më 14 Mars për Ditën e Verës.
Mësohet se nga aksidenti ka vetëm dëme materiale dhe asnjë person nuk ka pësuar dëmtime. Shkaqet e përplasjes janë të paqarta, teksa në vendngjarje kanë shkuar forcat policore. Drejtuesi i automjetit të dytë është shoqëruar nga uniformat blu për t’u marrë në pyetje. Grupi hetimor është duke punuar për të zbardhur dinamikën e këtij aksidenti.
