Policia italiane ka goditur një bandë me anëtarë shqiptarë që kishin si veprimtari kriminale trafikun e drogës dhe grabitjet me armë. Banda e ushtronte aktivitetin në disa rajone të shtetit fqinj, 22 shqiptarë në pranga.
Mediat italiane shkruajnë se mëngjesin e sotëm janë ekzekutuar 22 urdhër arreste për shtetas shqiptarë, anëtarë të një organizate kriminale, që vepronte në Pomezia, Torvaianica e Ardea.
Grupi kriminal vepronte prej disa vitesh në Itali, ndërkohë që bazën logjistike e kishte në ultësirën e Torvaianica, Pomezia dhe Ardea. Gjatë aksionit janë gjetur dhe konfiskuar rreth 350 kg marijuanë, 500 gram kokainë, armë etj.
Operacioni ka qenë një bashkëpunim aktiv me Skuadrën e Shpejtë të Ankonës, Kuneos, Padovës, Pratos dhe Viterbos. Në të u angazhuan rreth 100 karabiniere, pjesë e departamenteve të hetimit dhe njesive speciale të Policisë së Shtetit.
