Nga Boldnews.al
Ndërsa pacientët dhe familjarët e tyre detyrohen të blejnë ilaçe në farmacitë private, në Farmacinë Qëndrore të QSUT-së dergjen një mal me ilaçe të skaduara. Më shumë se 93 % e stokut të ilaçeve në farmacinë qendrore prej vitesh janë skaduar dhe qëndrojnë në pritje të një tenderi të madh i cili do të zhvillohet për asgjësimin e tyre.
Përveç stokut të trashëguar ndër vite, drejtoria e QSUT-së nën justifikimin se do të bëjë një planifikim më të mirë të furnizimit me ilaçe, ka lënë shumë pavionë pa medikamentet kryesore, duke çuar drejt vdekjes së shpejtë pacientët.
Mjekët ankohen se në shumë raste mungojnë barnat kryesore që janë të domosdoshëm për të sëmurët e hospitalizuar. Disa prej tyre janë zëvendësuar me medikamente që importohen nga Bullgaria, India, Kina dhe vende të tjera të Europës Lindore.
“Përdorimi i medikamenteve pa cilësi më së paku shton ditët e qëndrimit në spital të pacientëve. Detyrohemi që ti mbajmë të sëmurët deri në dy javë shtrim, për të luftuar gradualisht sëmindjen, kjo për shkak të cilësisë mjaft të ulët të barnave”, shprehen mjekët, ndërsa shtojnë edhe faktin e tmerrshëm se: “në disa raste pacientët që vijnë në gjendje të rëndë shëndetësore humbin jetën, pikërisht nga mungesa e efektit të menjhershëm të ilaçeve pa cilësi”.
Edhe pse në mbledhje të shumta kanë kërkuar që QSUT të furnizojë pavionët me ilaçe që përdoren nga vendet e BE-së, fatkeqësisht vetëm 15 % e stokut të medikamenteve janë të firmave të njohura evropiane, pjesa tjetër mbërrin nga tregje të dorës së tretë. Nën pretekstin e uljes së shpenzimeve, QSUT ka zënë vend në tregun kinez dhe atë të Europës Lindore.
Keqmenaxhimi i qëllimshëm i treguat farmaceutik të QSUT-së ka bërë që aktualisht në Farmacinë Qëndrore të saj janë qindra mijëra medikamente të skaduara. Barnat u përkasin viteve 2012-2018 dhe kapin një kosto totale kontabël prej 481.8 milionë lekësh (rreth 3.9 milionë euro).
Nga këto, ilaçe me vlerë kontabël 447 milionë lekë, rezultojnë të skaduara dhe vetëm 34.7 milionë brenda afatit të përdorimit. Dëmi i madh ekonomik pasohet nga të tjera skandale, pasi së shpejti pritet të zhvillohet një tender për asgjësimin e medikamenteve të skaduara.
Për këtë skandal të tmerrshëm financiar dhe dëm edhe për shëndetin dhe ambientin drejtuesit e QSUT-në nuk kanë proceduar penalisht asnjë person përgjegjës. Përkundrazi, në muajt e fundit ka pasur sërish sasi të madhe medikamentesh të blera shtrenjt, por me afat përdorimi pak mujor dhe për pasojë kanë skaduar.