Kryetari i PD, Lulzim Basha, duke folur për krizën politike në Shqipëri, ka sjellë dhe njëherë në vëmendje ‘Dosjen 339’, ku gjatë përgjimeve del biseda mes kryebashkiakut të Durrësit Vangjush Dako, me një anëtar të bandës së Avdylajve, i njohur me nofkën Niçe.
Në këtë moment Basha ka bërë një batutë dhe me Fleckenstein, ku i thotë moderatorit të emisionit ‘Zonë e Lirë’, se me shumë gjasë Knuti tek Niçja është ngatërruar, dhe ka kujtuar se Gjushi ka folur me filozofin Gjerman dhe jo me hajdutin.
Basha: Ndërkombëtarët e kanë kuptuar se Niçja i Ramës s’është filozofi. Ata po flasin për një qeveri që ka kapur zgjedhjet. Kanë ikur ministra për një sanduiç në Slloveni, se kishte ikur pa e paguar, deputetë për një shishe verë në Gjermani, për një biletë treni në Holandë. Kjo pra është, që të mos ketë populli qeverinë, por qeveria popullin. Kjo ndodh kur e lidh fatin me njerëzit, kur e lidh me votën e njerëzve, jo kur e lidh me Avdylajt, me Nicen. Se po e lidhe me Niçen, ça ndodh…vjedh popullin…
Arian Çani: Duhet sqaruar se Niçja nuk është filozofi i famshëm gjerman.
Basha: Ke të drejtë, nuk është Friedrich-i. A thua ky është keqkuptimi me Knutin, mos ka kujtuar se Vangjushi i ka bërë pazaret për vota me Friedrich Niçen?
Ka një histori qendrimi i ndërkombëtarëve, jo vetëm për Shqipërinë, por për të gjithë Ballkanin. Ata thonë stabiliteti-stabiliteti-stabiliteti. Tani kanë filluar të ndërgjegjësohen, se po të shikosh të gjitha mediat kryesore evropiane po thonë: protestat në Shqipëri janë kundër një qeverie që akuzohet për korrupsion, të lidhur me krimin dhe që ka kapur apo ka prishur zgjedhjet.
