Nga Boldnews.al
Qendra Spitalore Universitare Tiranë ka parashikuar të harxhojë rreth 100 milionë lekë për mirëmbajtjen e lulishteve dhe ambjenteve përreth, ndërkohë që pacientët e Urgjencës dhe pavioneve të tjera vuajnë mungesën e theksuar të ilaçeve.
Spitali më i madh në vend, i cili vuan prej disa vitesh keqmenaxhimin dhe dështimin e projektit “Shëndetësia falas”, ka vendosur të shpenzojë afro 100 mijë dollarë për fasadën, për pamjen e jashtme .
Drejtuesit e QSUT sapo kanë hapur dy tendera, të cilat, njëri për “Shërbimin e mirëmbajtjes së sipërfaqes së gjelbërt”, me vlerë 4.81 milionë lekë të reja dhe tjetri “Shërbimi i pastrimit të ambjenteve të jashtme, me vlerë 4 milionë lekë të reja.
Ky shpenzim është tërësisht i tepruar, në një kohë që shërbimi spitalor pranë QSUT është përkeqësuar ndjeshëm. Thuajse çdo ditë, qytetarë të ndryshëm raportojnë në redaksinë e “Boldnews.al” dhe në media të tjera për kushtet e rënduara të shërbimit spitalor në qendrën më të madhe të Shqipërisë, ku përfshihen mungesa e medikamenteve, cilësia e ulët dhe “moskokëçarja” e instancave drejtuese.
Por, përtej kësaj situate kritike, administratorët e QSUT kanë vendosur të investojnë një shumë tepër të konsiderueshme për “mirëmbajtjen e lulishteve”.
Gjelbërimi i ambjenteve spitalore, në fakt, është bonus në shërbim të pacientëve që frekuentojnë shërbimin spitalor. Por, për pacientët, të cilët vuajnë mungesën e ilaçeve dhe cilësinë e ulët të shërbimit, gjelbërimi i ambjenteve shlodhëse brenda Qendrës Spitalore Univerisitare “Nënë Tereza” nuk përfshihet në listën e tyre të prioriteteve.
E, megjithatë, ajo që kërkojnë pacientët dhe familjarët e tyre nga QSUT nuk përputhet, siç duket, me projektet e drejtuesve të qendrës spitalore.
Administrata e lartë e QSUT ka vendosur të “mbjellë” 100 milion lekë (të vjetra) shkurre, nëpërmjet të cilave do të përmirësojë shëndetin e pacientëve, të cilët, në radhë të parë kërkojnë të marrin kurat dhe ilaçet e nevojshme.
Dy tenderat e shtrenjtë janë hapur në datën 5 mars dhe ofertat pritet të dorëzohen deri në 15 Mars 2019.
