Gazetari Basir Çollaku ka treguar në emisionin “Opinion” një dokument të dosjes së Saimir Tahirit mbi një udhëtim që Moisi Habilaj, kreu i bandës së trafikut të drogës ka pasur në Itali me babain e ish-ministrit dhe bashkëshortes së tij. Gazetari tha se skandali është se Moisi Habilaj, Bashkim Tahiri dhe Fatlinda Tahiri kanë udhëtuar në të njëjtën sedije të avionit “Alitalia”, por emrat e tyre janë fshirë nga sistemi TIMS. Kjo sipas tij për të hequr çdo alibi për lidhje të Tahirit me Habilajt pas plasjes së skandalit.
“Unë këtu kam dokumente që tregojnë udhëtimin e Moisi Habilajt me babain e Tahirit dhe bashkëshorten e tij Fatlinda Tahiri drejt Italisë. Nuk janë shënuar në sistemin TIMS, por janë në listat e udhëtimit të kompanisë, Alitalia. Pasaportat e tyre janë sekuestruar nga prokuroria dhe aty janë gjetur vulat. Në Rinas nuk kanë asnjë vulë, por vetëm vula e Italisë. Kjo është bërë për të mos faktuar udhëtimet. Ka dhe udhëtime të tjera” – tha Çollaku duke treguar edhe dokumentin e siguruar nga dosja “Tahiri” e cila ka shkuar tashmë në gjykatë.
