Artan Spahillari është një ish-punonjës i ARMO-s në filialin e kompanisw në Vlorë që pret 13 rrogat e tij. Artani erdhi të më takonte së bashku me Marion, djalin e tij 4-vjeçar që shkon në kopsht.
“Babi, xhaxhi ka ardhur për të na sjellë lekët?”,-thotë 4-vjeçari, ndërsa fliste shumë fjalë që nuk kuptoheshin.
Artani jeton së bashku me 3 fëmijët e tij dhe bashkëshorten në qytetin e Vlorës, ndërsa më tregon se në ARMO ka punuar prej vitesh, por tanimë me prishjen e kontratës dhe me falimentimin e kompanisë, ai është papunë, ndërsa e ka kërkuar në çdo institucion të drejtën e tij, por deri më tani pa rezultat.
“Ne kemi fituar vendimin e Gjykatës, përmbarimi na ka gënjyer për një vit me radhë, jo sot jo nesër na thotë. Shteti duhet të ndërhyjë për të na zgjidhur këtë situatë, sepse ajo është djersa jonë, nuk po kërkojmë as ndihmë ekonomike e as asgjë tjetër, por punën tonë. Tani këta thonë se e ka sekuestruar banka. Normal, banka ka fuqinë të marrë borxhet e saj, po ne të shkretët çfarë do të bëjmë, ku do t’i marrim paratë tona.”,-shprehet ai i revoltuar.
Por Artani nuk e ka problem vetë mosmarrjen e pagave, ai shprehet mjaft i shqetësuar edhe për filialin e rafinerisë në Vlorë, i cili është në hyrje të qytetit, por që është i sekuestruar dhe jashtë pune prej muajsh.
Ai thotë, se filiali do patjetër mirëmbajtje, dhe lënia pa punë e tij mund të çojë në një dëm të madh, jo vetëm për pasurinë që ai filiali ka brenda, por edhe për banorët që jetojnë afër tij.
Pagat
Falimentimi i Kompanisë ARMO, ka sjellë prej vitesh probleme jo vetëm për shtetin shqiptar, por edhe për dhjetëra punonjës të kësaj kompanie që ende kanë detyrime të pashlyera nga ana e ARMO-s.
26 punonjës të Filialit të ARMO-s në Vlorë i janë drejtuar Dritare.net, për të ngritur shqetësimin për pagat e tyre, fati i të cilëve ende nuk dihet.
Pas falimentimit të ARMO-s punonjësit mbetën pa pagat e tyre, ndërsa kompania u detyrohet ende 13 paga.
Punonjësit janë të pajisur me kontratë kolektive dhe individuale për periudhën kohore 03/06/2016 deri më 23/06/2019, por me falimentimin e ARMO-s kjo kontratë është prishur në mënyrë të njëanshme, ndërsa ata i janë drejtuar Gjykatës për të kërkuar të drejtën e tyre, marrjen e pagave për punën që ata kanë bërë.
Gjykata
Sipas vendimit të formës së prerë të gjykatës së rrethit gjyqësorë Vlorë, 61-2017-4372, të datës 29/09/2019 kompania ARMO u detyrohet 13 paga, 26 punonjësve të kësaj kompanie. Po me këtë datë Gjykata ka vendosur për të lëshuar urdhrin e ekzekutimit të këtij vendimi, ndërsa ka ngarkuar shërbimin e përmbarimit shtetëror ose privat për të ekzekutuar këtë vendim.
Por, sot e asaj ditë shërbimi përmbarimor që ka marrë përsipër ekzekutimin e vendimit ende nuk e ka ekzekutuar atë, për shkak se siç shprehen punonjësit për Dritare.net ai u ka thënë atyre se është i bllokuar nga shteti.
Falimentimi i ARMO-s
Filiali i kompanisë ARMO në Vlorë është vendosur nën sekuestro nga përmbaruesit privatë për shkak të borxheve që ka ndaj shtetit shqiptar. Pas largimit të firmës azerbajxhanase punëtorët kanë 13 muaj pa u paguar.
Shoqëria ishte njëkohësisht në pronësi të shtetit, në masën 15 për qind. Ndërsa me 3 mars 2016, u regjistrua një shpallje nën sekuestro nga një bankë e nivelit të dytë për dy kredi të pakthyera në vlerën 2.8 milionë euro që kishte marrë kompania në vitet 2010 dhe 2011.
Edhe një bankë tjetër para disa ditësh shpalli vendosjen nën sekuestro të një pjese të aseteve për huan 20 milionë euro të kompanisë.
Qeveria
Punonjësit e ARMO-s i janë drejtuar disa herë edhe qeverisë shqiptare, konkretisht Ministrisë së Infrastrukturës dhe Energjetikës, për problemin e tyre.
Me datën 17 janar 2019, Ministri i Financave dhe Ekonomisë së asaj kohe, Arben Ahmetaj ka deklaruar se punonjësit e rafinerisë së naftës në Fier dhe në Ballsh dhe filialit të Vlorës, i cili varet nga Ballshi që nuk kanë marrë rrogat e prapambetura, do të marrin statusin e të papunit për të përfituar pagesën e papunësisë.
Problemet e ARMO-s, dhe dëmi apokaliptik që i ka shkaktuar shtetit dhe qytetarëve, e kanë gjenezën e tyre që në vitin 2008, fill mbas privatizimit të saj nga biznesmeni famëkeq i hidrokarbureve Rezart Taçi, i cili mori në kontroll 85% të aksioneve të ARMO nëpërmjet kompanisë Anika Mercuria Rafinery Associated Oil, AMRA Oil, për 128 milionë euro. Por, punëtorëve të Vlorës, as që u intereson problemi që ka shteti me kompaninë, ata duan rrogat e prapambetura për mundin e tyre./ Nga Isa Myzyraj, Dritare.net
