Burime i thanë Dosja.al se dy anëtarë të dy grupeve shumë të fuqishëm në qytetin e Vlorës, me influencë politike dhe ekonomike janë përplasur në bashkinë e Vlorës për një leje ndërtimi në një truall në afërsi të rrugës Transballkanike. Pas ngjarjes, bashkia është nën terrorin e frikës. Nënkryetari i Bashkisë, Shkëlqim Rama ka dhënë dorëheqjen. Kryetari, Dritan Leli ka shtuar masat e sigurisë.
Përgjatë viteve të fundit qyteti i Vlorës është bërë ‘qendra’ e ngjarjeve kriminale. Dhjetëra të vrarë e të zhdukur në një trekëndësh që po lidh gjithnjë e më fort krimin, shtetin dhe biznesin.
Dhe siç duket situata vazhdon të përkeqësohet. Dosja.al zbardh ngjarjen e gati 3 javëve më parë, ku në Bashkinë e Vlorës është regjistruar një ngjarje e paprecedentë.
Burime i thanë Dosja.al se dy anëtarë të dy grupeve shumë të fuqishëm në qytetin e Vlorës, me influencë politike dhe ekonomike janë përplasur në bashkinë e Vlorës për një leje ndërtimi në një truall në afërsi të rrugës Transballkanike.
Dy anëtarët kanë aplikuar për një leje ndërtimi në të njëjtin truall dhe janë konfliktuar në ambientet e bashkisë. Konflikti ka degjeneruar në sharje derisa kanë nxjerrë pistoletat dhe kanë kërcënuar juristin dhe drejtorin e zyrës së Urbanistikës në Bashkinë e Vlorës, i cili mësohet se ka dhënë dorëheqjen.
Po të njëjtat burime sqarojnë se ngjarja nuk është bërë publike nga policia. Ngjarja e rëndë ka detyruar kryetarin e Bashkisë, Dritan Leli që të shtojë masat e sigurië.
Leli ka ndërruar makinë si edhe ka shtuar numrin e rojeve që janë pjesë e eskortës së tij. Ndërkohë që prej 3 javësh, nënkryetari i bashkisë Vlorë, Shkëlqim Rama, ka dhënë dorëheqjen nga posti.
Këto nuk janë të vetmet ngjarje që po ndodhin në Vlorë. Pak ditë më parë, drejtorit të Urbanistikës në Vlorë iu dogjën 5 makina, ndërkohë që për ngjarjen nuk ka asnjë të shoqëruar. /Dosja.al/
