Skënderbeu luan këtë javë ndaj Teutës në transfertë një takim mjaft delikat. Në 9 javët e fundit, Skënderbeu ka pësuar plot 8 humbje duke mundur në shtëpi vetëm Laçin. Në prag të ndeshjes me Teutën, për mediat ka folur Marko Radas i cili shprehet se asnjëherë më parë nuk ka qenë në një situatë të tillë, ku numëron kaq shumë humbje.
“Përgjegjësia? Normal, edhe ne lojtarët mbajmë përgjegjësi për situatën që po kalojmë. Nuk është këtu vetëm trajneri apo stafi. Të gjithë kemi përgjegjësi, si për rezultatet e mira, ashtu edhe për të këqijat.
Problemi? Nuk di ta them, ndoshta më shumë përqendrimi. Në dy ndeshjet me Tiranën dhe Kastriotin kemi pësuar gola në minutat e fundit, kur mund të merrnim një pikë. Përqendrimi ka munguar, loja nuk ka qenë e keqe, kemi krijuar raste, por nuk shënojmë gola. Mungon përqendrimi. Kur merr rezultate të këqija bëhet edhe psikologjike. Mendja e lojtarit, afrimet e bëra që duan kohën e vet, fati. Bëhen të gjitha bashkë.
Tension? Brenda ekipit nuk ka asnjë problem. Vetëm është një periudhë që nuk e di si ta përshkruaj. Dilet vetëm me rezultate të mira. Duhen disa fitore, jo të fitosh një e të humbësh sërish.
Të rinjtë? Edhe unë flas, edhe Kristi e Muzaka. Kemi folur brenda dhomës, nuk tregohen këtu. Nëse nuk e kuptojnë peshën e fanellës, as unë, as trajneri, as presidenti nuk kanë ndikim.
8 humbje në 9 ndeshje? Më ndodh për herë të parë në jetën time. Edhe në klubet jo kaq të forta sa Skënderbeu, nuk më ka ndodhur të humb tetë ndeshje në 9 takime. Është një situatë shumë e keqe. Të mendosh më shumë për këtë situatë, do shkosh më keq. Duhet ndryshuar. Mendja e gjithsecilit duhet të ndryshojë vetë.
Nervat në fushë? Normal, pasi edhe unë kam përgjegjësi për këto rezultate. Jam një nga lojtarët më të vjetër këtu. Kur shikoj që nuk ecin gjërat mirë javë pas jave, normal që mendoj se kam përgjegjësi.
Problemet me tifozët? Ishte një problem me një nga lojtarët tanë. Bëra muhabet me tifozët. Ishte ndeshje e keqe, pati tension. Tifozët duan 100% në çdo ndeshje.
Ndeshja me Teutën? Synojmë që ndeshjen e radhës të mos pësojmë gol. Kemi 7-8 ndeshje që pësojmë, tani synojmë të mos pësojmë. Nëse ndodh, do të marrësh edhe rezultat. Edhe një pikë është mirë në Durrës”, tha Radas.
