Këtë të premte në Prokurorinë e Tiranës janë thirrur rreth 15 persona, banorë të Unazës së Re mes tyre edhe avokati dhe aktivisti, Artan Manushaqe për të dëshmuar në lidhje me çështjen protestës së Astirit. Sipas policisë 15 personat e proceduar penalisht kanë ushtruar dhunë gjatë protestave të Astirit.
“Na ka ardhur një shkresë zyrtare se duhet të paraqiteshim në orën 9:30 në Prokurorinë Gjyqësore të Tiranës jemi pyetur nga OPGJ-të, për protestat dhe rrethanat dhe faktet sot me urdhër politik është thirrur edhe një djalë 17-vjeçar i cili nuk ka lidhje fare me ngjarjen. Komisariati Nr. 6 është nën presionin e drejtorit Ardi Veliut. Këto janë urdhra politike të Tiranës, duket që Prokuroria është nën presion, unë kam dalë në protestë dhe do të vazhdoj deri tek kauza e fundit, ajo e mbrojtjes së mjedisit”, është shprehur avokati Manushaqe.
Dorian Protoduari është banori tjetër i Astirit i cili është proceduar penalisht dhe sipas tij ky është një urdhër politik.
“Kjo ka një arsye themelore për thirrjen e 15 vetave, kjo është arsyeja e Edi Ramës, me urdhër politik të Edi Ramës, ne kemi qenë paqësor me policinë, madje u kemi kërkuar ndjesë që kemi dalë dhe kemi bllokuar rrugën , por jemi të detyruar të dalim sepse po na shemben shtëpitë. Sot Damiani bashkë me shokët duhet të thirren në Prokurori jo banorët e Astirit të cilët nuk kanë bërë asgjë, por këta që vodhën 18 milonë euro, këta duhet të jenë aty.
Më thanë ke dalë në protestë, unë bëra burgun e Damian Gjiknurit, të Afrim Qendros dhe jo burgun tim sepse unë nuk kam bërë asgjë për të bërë burg.
Liro ti shtëpinë se dua unë, ose do të më bëjnë viktimë o do i bëjmë viktima, shtëpinë time unë nuk e liroj edhe pse do Edi Rama apo Damian Gjiknuri, apo lali Eri, është prona ime e kam ndërtuar vetë dhe nuk mund të ma prishë njeri. Ne do dalim të protestojmë edhe me datë 5 mars, ta harrojnë ata se na ndalin“, tha Dorian Protoduari.
Ky i fundit u shpreh se urdhri politik është mëse i qartë duke vërejtur dhe çudinë e fundit të policisë e cila thirrur dhe vëllain e vogël të Dorian Protoduarit, Mariglenin i cili është me studime në Rumani.
“Ai nuk ka qënë kurrë në protestë dhe kjo vërtetohet nga sistemi TIMS, por këtë e bëjnë se është vëllai i Dorianit dhe t’i bëjmë presion. Ne do vazhdojmë të dalim në protestë sepse është e drejta jonë, pavarësisht se ata mund të na bëjnë presion”
