Nga Boldnews.al
Përballë protestës masive të opozitës, qeveria po mundohet të shmangë çdo përballje të mundshme, dhe si një nga mënyrat për t’i bishtnuar, mbetet zhvillimi i punimeve Parlamentare jo në ditën e zakonshme, të hënën dhe enjten.
Taktika që po ndjek mazhoranca para valës së protestave të opozitës është e njëjtë me të paraardhësve të tyre në vitet 1941-1944. Gjithçka ka nisur më 8 nëntor të vitit 1941, me krijimin e Partisë Komuniste dhe më pas deri në përfundim të luftës, çdo mbledhje ishte në ilegalitet…
Emrat kanë ndryshuar, Partia është në vijimësi, por strategjia që ndjek “elita sot” mbetet e njëjtë. Po kështu edhe kryeministri Edi Rama nuk lëviz i qetë në turin e tij me antimitingjet “bashkia që duam”. Për tu dredhuar “armiqve” opozitarë, që bllokojnë rrugën në protesta të paqta, kreu i qeverisë gjithnjë gjen një shteg dytësor për të mbërritur në destinacion.
Në Tiranë, aty ku gatuhet politika, qeveria po mundohet të vijojë punën sikur “asgjë” nuk ka ndodhur, por gjithnjë me kujdesin e veçantë për të marrë vendime në ilegalitet dhe larg protestuesve.
Taktika e sotme për të mbajtur punimet Parlamentare të mërkurë, në orën 17.00, ishte një lëvizje e mirëmenduar, pasi u njohën më parë për organizmin e protestës së opozitës të parashikuar në paraditen e së enjtes.
Këto dredhi, sa qesharake aq edhe djallëzore, më shumë se për të ruajtur veten kërkojnë të shmangin përballjen me protestat masive të opozitës. Trajtimi i grupimit opozitar e madje edhe qytetarëve që reagojnë kundër qeverisë si armiq, shton edhe më shumë ndasitë në vend.
Deri më tani “Njësiti Gueril” po mendon strategjinë e shmangies, pa arritur në frikën e madhe të kundërsulmit….
