Nga Boldnews.al
Ambasadori i BE-së në vendin tonë Luigi Soreca, me profil policesk në karrierën e tij, po bëhet mjaft aktiv në zhvillimet e fundit, duke marrë protagonistin politik si “zë i huaj” në mikrofonin e qeverisë.
Në çdo dalje publike, apo qëndrim zyrtar, thelbi i deklaratave të Sorecës është: “Qeveria të vijojë punën për integrimin në BE, opozita të distancohet nga aktet e dhunës në protestë”.
E përkthyer në gjuhën e Edi Ramas, kjo do kishte kuptimin: “Qentë le të lehin, karvani të shkojë përpara”… Karvani është qeveria, ndërsa “qentë që lehin” nënkuptohet se i përkasin pjesës së opozitës. “Vendi i opozitës ështëparlamenti.
Qeveria dhe opozita duhet të dialogojnë, ndërsa qeveria të vijojë punën për integrimin në BE. Përfaqësuesi i PE do të jetë nesër në Tiranë. Thirrje opozitës për një protestë të qetë dhe pa dhunë”, u shpreh ambasadori Soreca, paraditen e sotme.
Shpejt edhe Soreca përfundoi në paradhomën qeveritare me qëndrimet e tij, aq sa është e vështirë të dallohet nga paraardhësja Romana Vlahutin, ndryshimi është se ajo “vishte fustan”…
Kërshëria në momentin e ardhjes së tij në Shqipëri si përfaqësues i BE-së ishte e madhe, kjo duke parë të shkuarën e tij më shumë si hetues sesa një politikan. Ndoshta u gjet njeriu i duhur për një vend si Shqipëria, që i përngjante një “Siçilie”, në atë vend ku Soreca në rini u dërgua nga pala italiane për të luftuar mafian.
Organizmi ndryshon, por jo produkti final që është trafiku i drogës, krimi i organizuar, vrasjet e rivalëve dhe lidhjet e forta të politikës me krimin. Por Soreca ka marrë rolin e diplomatit, qëndrimi i të cilit shihet si ndërhyrje e pastër në çështjet e brendshme të vendit. Për më shumë, është një zë që në çdo deklaratë do e kishte zili edhe zëdhënësi më i nënshtruar i kryeministrit.
Vjen nga një vend si Italia ku protestat, zgjedhjet e shpeshta të parakohshme dhe ndryshimet e qeverisë janë një pjesë rutinë e zhvillimeve politike. Në vendin e tij nëse do të dilte me këto qëndrime, të ngjashme me atë të zëdhënësit të qeverisë, nuk do ia kursenin shprehjen në majë të gjuhës: “Va fan culo…”
Jemi në Shqipëri, Soreca dhe homologët e tij kanë gjetur parajsën e protagonizmit. Ndërsa paradite trazojnë vendin e diktojnë politika, pasdite vonë akomodohen në vilat luksoze në periferi të Tiranës, të ndërtuara nga oligarkët e vendit.
