Edi Rama deklaroi sot në mbledhjen e kryesisë së Partisë Socialiste, se puna në Kuvend dhe parlament do të vazhdojë sikur të mos ketë ndodhur asgjë dhe se mungesa e opozitës, nuk përbën problem. Në këtë situatë ditën e sotme është mbledhur edhe komisioni i Ligjeve, i cili ka vazhduar punimet me karriget bosh të opozitës.
Pas vendimit radikal të opozitës së bashkuar, për të braktisur përfundimisht parlamentin, vetëm 2 deputetë nga radhët e tyre kanë deklaruar se do të vazhdojnë, që të bëjnë fasadën në Kuvend; Myslim Murrizi nga PD dhe Lefter Koka nga LSI. Kurse Rudina Hajdari, ende nuk është shprehur përfundimisht.
Nëse Rama e ka ndarë mendjen, që “të ecë përpara”, ashtu siç edhe deklaroi në kryesinë e partisë së tij, atëherë i bie që këta dy individë, të marrin pushtet të pa parë në Kuvendin e Shqipërisë.
Kështu Lefteri me Myslimin, do të duhet të ndajnë postin e Nën Kryetarit të Kuvendit; do të kenë 3 karrike në Konferncën e Kryetarëve; 5 vende në Këshillin e Rregullores; po aq (5) në atë të Legjislacionit; ju duhet të ndajnë mes njëri tjetrin, edhe Kryetarin e Komisioneve për Median, Shëndetësinë dhe Integrimit, për të mos folur për postin e nënkryetarëve dhe anëtarëve, në të gjithë komisionet e tjerë.
Duke patur parasysh se përveç gjithë këtyre dhjetëra detyrave, dyshja Murrizi-Koka do të “zënë” edhe gjithë karriget bosh të opozitës në seancat plenare, atëherë situata bëhet, sa komike aq edhe tragjike.
