Koalicioni Qytetar për Shqipërinë ka vendosur të padisë Autoritetin e Komunikimeve Elektronike dhe Postare (AKEP), lidhur me ndërprerjen e valëve telefonike gjatë protestës së opozitës.
Në protestën e 21 shkurtit, zhvilluar para godinës së Parlamentit, AKEP bllokoi valët e telefonisë celulare në zonën rreth protestës, një veprim që shkaktoi mjaft probleme jo vetëm në komunikimet mes qytetarëve, por edhe në raportimet mediatike rreth protestës.
Sipas Koalicionit Qytetar për Shqipërinë, ky vendim i AKEP u mor në kundërshtim me Ligjin pasi të vetmet raste të parashikuara:
– kërkojnë miratimin e një VKMje nga Këshilli i Ministrave me propozim të Ministrit që mbulon telekomunikacionin!
– rasti në fjalë nuk hyn tek rastet që parashikon ligji.
Kjo sjellje e papreçedentë në 29 vjet është një përshkallëzim i rëndë i represionit policor ndaj qytetarëve dhe redukton ndjeshëm liritë reale demokratike të shtetasve duke krijuar një preçedent të rrezikshëm për të ardhmen e angazhimit politik dhe demokratik të shtetasve.
Nisur nga nevoja për reagim në kushtet që asnjë formacion politik opozitar dhe asnjë OJF e të drejtave të njeriut apo të drejtave të konsumatorëve nuk ka reaguar, Koalicioni Qytetar Për Shqipërinë ka autorizuar Avokati Altin Goxhaj që nëpërmjet Studios Ligjore të ngrejë një padi kolektive ndaj AKEP për këtë shkelje të rëndë me qëllim që raste të tilla të mos tolerohen më dhe të pengohen.
Për këtë qëllim, në kuadër të legjislacionit për të drejtën e informimit publik, AKEP-it do t’I kërkohet që brenda 10 ditëve të dorëzojë kopjen ligjore të urdhërit që i dha 3 kompanive celulare, e cila do të shërbejë si prova që do të goditet në Gjykatën Administrative.
