Ende nuk ka një marrëveshje për Brexit. Alarmin e ka dhënë Presidenti i Komisionit Europian Jean-Claude Juncker, në fjalën e tij përpara Komisionit Ekonomik dhe Social.
“Nëse nuk do të ketë marrëveshje, dhe nuk e përjashtoj këtë gjë, do ketë pasoja të mëdha. Po mundohemi të evitojmë më të keqen, por nuk jam optimist. Po bëjmë çdo përpjekje që dalja e Britanisë nga Bashkimi Europian të jetë e organizuar, në mënyrë civile, e rregullt dhe e mirëmenduar, por ende nuk i jemi afruar kësaj gjëje. Në Parlamentin britanik votojnë gjithmonë kundër diçkaje, nuk ka një mazhorancë të qartë”, është shprehur Juncker.
Ndërkohë, kryetari i Partisë Laburiste Jeremy Corbyn ka thënë se do të kërkojnë një referendum të dytë. “Si Parti Laburiste nuk duam një dalje pa marrëveshje. Kemi propozuar një bashkim doganor me Bashkimin Europian. Besojmë se është një propozim i mirë dhe takimet tona kanë treguar se mund të negociohet. Ne do të bëjmë një mocion në Parlament, siç e bëmë edhe më parë, për një referendum. Atëherë u refuzua, por mbetet pjesë e axhendës sonë.” Sipas Corbyn, problemi është se kryeministrja Theresa May këmbëngul në marrëveshjen që u hodh poshtë nga Parlamenti./Boldnews.al/
