Nga Boldnews.al
Për kryetarin e Bashkisë Tiranë Erion Veliaj, protesta e opozitës më 16 shkurt ishte ndryshe nga të tjerat. Për të erdhi ai moment ndoshta për herë të parë në karrierën e tij në pushtet kur shpresonte fort në suksesin e kundërshtarit politik, me parimin: “Armiku i armikut tim, është miku im”…
Masat i kishte marrë që gjithçka atë ditë të mbyllej me sukses që nënkuptonte rrëzimin e Ramës, çka do i jepte shansin për tu katapultuar në drejtimin e partisë, me mbështetje nga brenda godinës së ngjyrosur me shijet e Ramës. Nuk mund t’i shpëtonte një detaj i rëndësishëm Lali Erit që në krye të kortezhit të PDIU-së (Partisë për Drejtësi Integrim dhe Unitet) ishin nënkryetrja e Bashkisë Tiranë Kozeta Mesiti, Drejtori i Tregjeve Sokol Hysa dhe një grup tjetër nëpunësish të institucionit që drejton.
Përkundrazi, ata ishin të dërguarit e Veliajt, që në rastin e shpërthimit agresiv të dhunës do dilnin haptas për të marrë situatën nën kontroll, pasi “ujku mjergull do”… Mes turmës së madhe kishte organizatorë të heshtur, si përfaqësuesit e PDIU, zyrtarisht në opozitë, por praktikisht me pushtetin. Indirekt po instruktoheshin protestues që nuk kanë çtë humbin për të “kafshuar” më së paku kërpudhën e vendosur në oborrin e kryeministrisë, atë vepër frymëzuese për kryeministrin.
Vullnetar doli i ashtuquajturi “Ujku i Cërrikut” (Saimir Rexhepi), një personazh grotesk, që e pa veten nga shkulja e kërpudhës në qelitë e burgut. Nga verifikimi që ka kryer Boldnews.al është siguruar një foto e tij teksa shfaqet me simbole të PDIU-së në një miting të organizuar nga kjo forcë në qytetin e Cërrikut. Më shumë se një foto mbetet frymëzimi, që këtë herë nuk dihet nga erdhi, por faktet të çojnë në një drejtim.
Pamjet filmime dhe fotot e shumta tregonin se numri dy i bashkisë Tiranë dhe disa drejtues të tjerë të lartë të këtij institucioni ishin aty në atë protestë masive të opozitës. Por Erion Veliaj nuk u ndje, as tentoi që “tu priste udhën” të tijëve, ai shihte në distancë tymin që dilte nga gazi losjellës dhe shpresonte që kjo mjergull helmuese të kthehej në flakë që do përvëlonin kryeministrin Rama.
Rama u kthye nga Vlora, ndonëse i dëmtuar nga “beteja” e 16 shkurtit që dha mesazhin e qartë se mijëra qytetarë kishin dalë aty jo vetëm në përkrahje të opozitës, por me mllef ndaj kreut të qeverisë. Burime konfidenciale të Boldnews.al kanë mësuar se Rama ka pasur një bisedë të tensionuar me Veliajn, pikërisht për praninë në protestë të vartësve të tij. Kjo situatë e detyroi Lali Erin që të urdhërojë shkarkimin e të gjithë pjesëmarrëve në protestën e opozitës të zyrtarëve të bashkisë.
Për PDIU-në, shkarkimi nga detyra i përfaqësuesve të saj është vetëm një “dëm anësor” në qëllimin kryesor, që mbetet sigurimi i një pushteti më të madh. Kartat i kanë hapur në “dy tavolina” në bllokun opozitar dhe atë të pushtetit. Zyrtarisht PDIU pak muaj më parë iu bashkëngjit opozitës, duke argumentuar se kjo forcë nuk mund të bëhej më vegël e një shteti totalisht të kapur nga marrëzitë e Edi Ramës.
Në këtë mënyrë i janë ngjitur pas kryedemokratit Lulzim Basha, që për çdo rast të jenë aty të pranishëm në ndarjen e pushtetit të ardhshëm. Nuk e kanë lënë me kaq, pasi tavolina tjetër e “pokerit politik” ka për protagonist lojtarin e etur për karrierë, famë e para, Lali Erin. Pasojat? Po i kalon “Ujku i Cërrikut” që dha një dorë për të shembur kërpudhën helmuese dhe haluçinante të Edi Ramës.
Veliaj nuk tërhiqet lehtë, për më shumë tani që Rama është në ditët më të zeza. Në protestën e studentëve gjatë muajit dhjetor, Lali Eri kishte miqtë e tij në protestë që nxisnin të rinjtë për të vijuar revoltën. Të tjerë raste do të ketë, tashmë Lali i butë që shfaqet pranë luleve dhe pemëve ka objektivin e qartë për të synuar rrëzimin e Ramës dhe siguruar fronin në Rilindje.
