Nga Boldnews.al
Drejtoria për Sigurimin e Informacionit të Klasifikuar (DSIK) është një prej institucioneve ndihmëse të Vetingut, i cili punon larg vëmendjes së publikut, pasi përpunon informacione të shërbimeve inteligjente.
Në sytë e publikut, kjo mënyrë funksioni i mbështjell me një perde misteri informacionet që sigurohen nga DSIK.
“Boldnews.al” ka siguruar në mënyrë ekskluzive disa raporte sekrete të DSIK, të cilat zbulojnë se ky “mister” nuk është gjë tjetër veçse një përmbledhje informacionesh operative, të paverifikuara, të paprovuara, ose të dhëna, të cilat nuk mund të penalizojnë gjyqtarët e prokurorët.
Redaksia e “Boldnews.al” ka zgjedhur të publikojë fillimisht raportet sekrete për dy prej subjekteve të shkarkuar nga Komisioni i Vetingut-dokumentin për ish-kryetarin e Gjykatës së Korçës, Admir Belishta dhe atë për ish-prokurorin e Prokurorisë së Përgjithshme, Artur Selmani. Në të dy rastet, DSIK ka konstatuar “papërshtatshmërinë”, mbi informacione, të cilat kanë dyshime të forta mbi vërtetësinë e tyre.
Rasti “Belishta”
Në raportin e datës 18.12.2018, DSIK ka konstatuar “papërshtatshmërinë” e subjektit Admir Belisha. Ky konkluzion është arritur, bazuar në informacionet e mëposhtme:
– Subjekti i rivlerësimit dyshohet se mund të kenë fyer dhe kërcënuar gjyqtarin M. D., pasi ky i fundit kishte rrëzuar kërkesën e një shtetasi.
– Dyshohet se subjekti i rivlerësimit mund të ketë favorizuar një shtetas të mitur, i gjykuar për veprën penale të vrasjes.
– Dyshohet se subjekti mund t’i ketë kërkuar një shumë të konsiderueshme parash një shtetasi, për të cilin ka pasur një proces gjyqësor për shpërdorim të detyrës dhe favorizim të kontrabandës.
– Admir Belisha, dyshohet se mund të ketë favorizuar një shtetas, i gjykuar në atë periudhë për veprën penale të plagosjes së rëndë me dashje.
Në raport nuk gjendet asnjë dëshmi, fakt apo provë për sa ka konstatuar më sipër DSIK. Gjithësesi, Komisioni i Vetingut, pasi dëgjoi sqarimet e subjektit Admir Belishta, vendosi se ai ishte “i papërshtatshëm”, vetëm për këto rreshta të shkruar në raportin e DSIK.
Rasti “Selmani”
Në raportin e datës 18.09.2018, DSIK ka konstatuar “papërshtatshmërinë” e subjektit Artur Selmani. Ky konkluzion është arritur, për faktin se prokurori Selmani ka qenë, në Shkurt 2017, ka qenë nën hetim për veprat penale të “shpërdorimit të detyrës” dhe “korrupsionit pasiv të gjyqtarëve e prokurorëve”.
Ky fakt ka qenë i njohur botërisht, si edhe fakti që hetimi për Selmanin u pushua pas tre muajsh, pasi nuk u gjetën elementët e veprës penale.
Gjithësesi, fakti që prokurori Selmani ka qenë nën hetim, ka qenë i mjaftueshëm për ta konsideruar atë të papërshtatshëm për vijimin e detyrës.
Me një artikulim të përgjithshëm e teorik, Drejtoria për Sigurimin e Informacionit të Klasifikuar (DSIK), konstaton se: “..Në këndvështrimin e përgjithshëm të kontrollit apo pastërtisë së figurës së një funksionari publik…çdo dyshim i arsyeshëm për kryerje apo moskryerje të veprimeve në kundërshtim me ligjin…cënojnë figurën e tij, integritetin, shkallën e besueshmërisë dhe e bëjnë këtë individ të mundshëm për t’u vënë nën presion nga strukturat kriminale..”.
Mbi bazën e këtij shpjegimi, të pabazuar në asnjë provë konkrete, DSIK ka konstatuar “papërshtatshmërinë” e prokurorit Artur Selmani për të vijuar detyrën.
Komisioni i Vetingut vendosi shkarkimin e prokurorit Selmani, për çështje të pasurisë, pa e marrë në konsideratë raportin e DSIK.
