Ambasada Amerikane, ka reaguar 24 orë pas vendimit të opozitës së bashkuar për të djegur mandatet dhe për të mos qenë më pjesë e të njëjtit parlament me personat e inkriminuar.
Në reagimin e saj Ambasada Amerikane, duket sikur deklarata është bëra nga organizata e Partisë së Punës së Shqipërisë njëherë e një kohë.
Përmes një postimi në rrjete sociale Ambasada Amerikane thekson se për të mirën e shqiptarëve deputetët nuk duhet të djegin mandatet. Është po e njëjta ambasadë që në 6 vitet e Rilindjes heshti dhe nuk tha asnjë fjalë për kanabizimin e vendit, edhe pse ‘Shqipëria e drogës’ ishte kryeartikull në të gjitha mediat amerikane dhe ato europiane.
Prej 6 vitesh edhe gjatë kohës që në krye të ambasadës së SHBA ishte Donald Lu, edhe sot, kjo ambasadë vijon të jetë në shërbim të Edi Ramës.
Ja çfarë shkruan ambasada amerikane:
Një demokraci e shëndetshme kërkon një opozitë që funksionon në mënyrë konstruktive brenda institucioneve kushtetuese. Kërcënimet nga Partia Demokratike, Lëvizja Socialiste për Integrim dhe parti të tjera opozitare për të braktisur mandatet e tyre në parlament minojnë parimet bazë të demokracisë dhe sabotojnë përparimin e rëndësishëm që Shqipëria ka arritur në zbatimin e ligjit dhe qeverisjen e përgjegjshme. Shtetet e Bashkuara iu bëjnë thirrje të gjithë deputetëve të ngrihen mbi sherret politike, të refuzojnë thirrjet për të braktisur mandatet e tyre dhe të mbrojnë idealet dhe parimet që janë me rëndësi thelbësore për çdo demokraci të fortë. Nëse dështoni të bëni punën tuaj, do të zhgënjeni njerëzit të cilëve keni privilegjin tu shërbeni.
