Deputeti i Lëvizjes Socialiste për Integrim, Lefter Koka, ka reaguar edhe njëherë pas vendimit të opozitës për djegien e mandateve, duke deklaruar se ai nuk ka ndërmend të heqë dorë nga mandati i tij.
Me anë të një postimi në rrjete sociale, ish-ministri i inceneratorëve, shprehet se nuk e lëshon mandatin që i kanë dhënë qytetarët durrsakë.
Kujtojmë që Koka firmosi gjatë kohës që ishte në krye të Ministrisë së Mjedisit, për ndërtimin e inceneratorëve në Durrës, çka solli në atë kohë ngritjen në protestë të durrsakëve.
Ja çfarë shkruan Koka në Facebook:
Opozita dje mori vendimin për të djegur mandatet e deputetit.
Vendimi im i palëkundur është se unë nuk do të djeg mandatin e deputetit, që mijëra durrsakë më kanë besuar. I zgjedhur prej vullnetit të bashkëqytetarëve të mi, për të ushtruar pushtetin legjislativ dhe të jem përfaqësuesi i tyre. Parimet e mia në 2 dekada te jetës sime politike janë udhëhequr vetëm nga interesi i qytetarëve. Janë ata që me kanë treguar gjithmonë cila është e drejta dhe e vërteta, janë ata bashkëudhëtarët dhe udhërrëfyesit e mi.
Ky nuk është një vendim thjeshte i Lëvizjes Socialiste për Integrim por i Saliut, i cili në shekullin e 21 bën thirrje për plumba ballit. Dhe nese erdhi dita që ai të tërheqë zvarrë LSI , a thua se LSI është Luli, nuk mund të më tërheqë zvarrë mua drejt aventurave qe une i gjykoj të turpshme për shoqërinë shqiptare dhe demokracinë.
Mandati im është besimi i mijëra qytetarëve. Është mandati i qytetarisë, kulturës dhe fisnikërisë durrsake , që as në ditët më të vështira të këtij qyteti nuk theu kurrë një xham. Qytetarët durrsakë kanë treguar në çdo kohë, se ata janë shembulli më i mirë i shoqërisë shqiptare. Mandati im nuk mund të përdoret asesi për t’i vënë flakën institucioneve shtetërore apo parlamentit shqiptar.
Thellësisht mirënjohës për të përfaqësuar sa më denjësisht zërin tuaj!
