Nga Boldnews.al
Gjyqtarja e Krimeve të Rënda, Liljana Baku, pritet të njihet me provat që policia gjeti në sirtarin e dhomës së gjumit të kolegut të saj, Skënder Damini, pasi ajo lejoi në një vendim ekstrem kontrollin e banesës së gjyqtarëve të çështjes “Dajti”.
Të premten e kaluar, forca speciale, të armatosur rëndë dhe të maskuar, mësynë në banesat e tre prej pesë gjyqtarëve që vendosën për zbutjen e dënimit ndaj Dritan Dajtit.
Kontrolli i banesave u ushtrua, pasi prokuroria mori lejen e gjyqtares Baku, pas dyshimeve se gjyqtarët mund të ishin përfshirë në korrupsion.
Për herë të parë në historinë e drejtësisë shqiptare, institucionet ligjzbatuese vendosën që të kundërshtojnë një vendim gjykate me forca policore, duke vendosur një precedent të rrezikshëm për pavarësinë e gjyqësorit.
Kushtetuta dhe Kodi i Procedurës Penale kanë parashikuar që vendimi i një gjykate është i atakueshëm vetëm në një gjykatë më të lartë. Por, në rastin konkret, prokuroria dhe Liljana Baku nuk pritën sa të zbardhen argumentat që gjyqtarët të zbardhnin argumentat e tyre, mbi të cilat janë mbështetur tek ajo vendimmarrje kontraverse.
Sipas Kodit të Procedurës Penale, pas kontrollit të banesave, policia i dorëzon prokurorisë dhe kjo e fundit gjykatës, provat e sekuestruara gjatë kontrollit të banesave. Në rastin konkret, Policia e armatosur dhe e maskuar arriti të gjente vetëm disa fishekë dhe 17 mijë euro në sirtarin e dhomës së gjumit të gjyqtarit Damini.
Pamjet e publikuara në media nga policia ishin më shumë se të turpshme, pasi i treguan publikut intimitetet e sirtarit të dhomës së gjumit të gjyqtarit, ndërkohë që nuk u arrit të gjendeshin “provat” e korrupsionit për vendimin ndaj Dritan Dajtit.
Është interesante se si do të jetë sjellja e gjyqtares Baku, pasi, si të gjithë qytetarët, pa se si urdhëri i kontrollit të dhënë prej saj u keqpërdor në mënyrën më absurde të mundshme.
Gjyqtarja Liljana Baku, gjatë muajve të fundit, ka marrë një protagonizëm të theksuar, sidomos sa u përket vendimeve që shkojnë në favor të qeverisë.
– Në Maj 2018, Baku refuzoi kërkesën e prokurorëve për caktimin e masës së sigurisë “arrest me burg” ndaj ish-ministrit të Brendshëm, Saimir Tahiri. Ajo u mjaftua vetëm me caktimin e “arrestit në shtëpi”, duke i dhënë mundësinë ish-ministrit të dyshuar për bashkëpunim me narko-trafikantët Habilaj që të sfidonte autoritetet hetimore nga banesa e tij.
Për të njëjtën çështje, gjyqtarja Baku refuzoi kërkesën e Prokurorisë për vijimin e hetimeve ndaj Saimir Tahirit. Prokurorët ende nuk kanë kompletuar provat e tyre, të cilat pritet të mbërrijnë nga letër-porositë në Itali dhe Mal të Zi. Por, gjyqtarja Baku vendosi që prokuroria të mbyllë hetimet deri në 10 mars 2019, afat, deri në të cilin, me shumë mundësi nuk do të kenë ardhur të gjitha informacionet e kërkuara.
Po në të njëjtin hetim, gjyqtarja Baku lejoi prokurorinë që të vijonte hetimet për ish-drejtorin e Policisë së Vlorës, Jaeld Çela, për të cilin gjithashtu priten informacione nga të njëjtat letër-porosi që janë dërguar edhe për Saimir Tahirin.
– Në Tetor 2018, gjyqtarja Liljana Baku vendosi të aplikonte masa sigurimi për personat që denoncuan përfshirjen në trafik narkotikësh të Agron (Geron) Xhafaj, vëllait të ministrit të Brendshëm të asaj kohe, Fatmir Xhafaj.
– Së fundmi, Baku lejoi kontrollin e banesave të gjyqtarëve të çështjes “Dajti”, menjëherë pasi zyrtarë të lartë qeveritarë, përfshirë edhe Kryeministrin, paralajmëruan se “nuk do t’i ndaheshin” për shkak të atij vendimi.
Pas zbatimit të kësaj “porosie” politike, tashmë gjyqtarja Baku duhet të vlerësojë provat e gjetura në sirtarin e dhomës së gjumit të kolegut të saj, Skënder Damini.
