Më shumë se 15 persona janë shoqëruar nga policia e Vlorës lidhur me atentatin e një ditë më parë në zonën e “Ujit të Ftohtë, ku u vranë dy persona dhe u plagos një tjetër.
Mes të shoqëruarve janë persona të cilët mund të kenë qenë dëshmitarë dhe që kanë patur konflikte të mëparshme. Burime nga policia e Vlorës bëjnë me dije se në vendin e ngjarjes janë gjetur me shumë se 25 gëzhoja.
Sipas burimeve, Çipuri ka deklaruar se nuk ka njohur asnjë prej autorëve dhe se nuk ka pas konflikte me njeri.
Atentati
Policisa njoftoi se atentati ndodhi në orët e mesditës. Sipas policisë viktimat janë qëlluar ndërsa po udhëtonin me makinën e tyre. Viktima janë identifikuar si Arjan Hasani dhe Orest Rexho. Ky i fundit mësohet se është pronar i një lokali në lagjen “24 Maji” e njohur ndryshe si lagjja “Çole”. Orest Rexho është gjithashtu kunati i Armando Sulejmanit, që mbeti i plagosur.
Raportohet se makinës në pronësi të Arjan Hasanit i është prerë rruga 200 metra para se të dilte në rrugë kryesore dhe është qëlluar me armë ndaj tyre. I plagosuri Armando Sulejmani është transportuar në spitalin e Vlorës për ndihmë mjekësore.
Policia bëri me dije se ai ka marrë dy plumba, një në krah dhe një në këmbë, por ndodhet jashtë rrezikut për jetën. Forcat policore kanë ngritur postoblloqe në disa pika kryesore të qytetit për kapjen e autorëve.
Atentatorët janë larguar më pas mes zonave të banuara dhe policia njoftoi se ka gjetur një makinë të djegur në Babicë. Viktimat janë të njohur për policinë. Një prej tyre dyshohet i përfshirë më kultivimin dhe trafikimin e kanabisit. I plagosuri, Armando Sulejmani, ka qenë edhe më herët shenjestër e një atentati. Ai u plagos në vitin 2016, pas një sulmi me armë pranë shtëpisë së tij.
Armando Sulejmani i njohur edhe si “Çipuri” dyshohet se ishte shënjestra e atentatit.
*Nga “masakra e Çoles”, tek vrasja e Edison Harizaj, zinxhiri i atentateve të përgjakshme në Vlorë
