Partia Demokratike pritet të mbledhë grupin parlamentar rreth orës 10 të kësaj të hëne. Burime thanë se do të diskutohet edhe për djegien e mandateve.
Pas PD, edhe Lëvizja Socialiste për Integrim do të ketë mbledhje grupi në orën 17 pikërisht për këtë çështje.
Kryetari i Partisë Demokratike Lulzim Basha njoftoi dje përmes një deklarate për mediet, djegien e mandateve parlamentare të opozitës, pasi siç tha, e ka lexuar mjaft qartë mesazhin e popullit në protestën e të shtunës.
“Mesazhi juaj ishte i qartë, kështu nuk vazhdohet më. Kupa është mbushur dhe është derdhur. Koha e fjalëve ka mbaruar dhe ne nuk do të vazhdojmë të jemi fasadë e një Parlamenti të dalë nga krimi i organizuar. Jam sot këtu të them me përgjegjësi të plotë se e kam lexuar vullnetin tuaj në atë protestë të kthyer në referendum popullor: I kam propozuar grupit të Partisë Demokratike dhe forumeve më të larta partiake djegien e mandateve tona në këtë Parlament”, tha Basha.
