Flamurtari gati që të marrë masa ndaj futbollistëve për prishje të imazhit dhe ndotje ambjenti. Në zyrat e klubit, kanë mbërritur ankesa të shumta nga pronarët e shtëpive ku lojtarët “jabanxhinj” kanë jetuar me qira.
Pronarët janë ankuar për rrëmujën që kanë gjetur në banesat e tyre që i patën lëshuar me qira për lojtarët kuqezinj. Gjendja e tyre pas largimit ka qenë katastrofë.
Në klub nuk duan që të zbulojnë emrat e lojtarëve “problematikë”, por burime pranë vlonjatëve pohojnë se nuk përjashtohet mundësia që të jenë edhe lojtarët kosovarë veç “jabanxhinjve” të tjerë.
Dhe nuk bëhet fjalë vetëm për rrëmujë, papastërti apo prishje të objektiveve të shtëpisë, pasi ankesat kanë shkuar edhe më tej. Dhe ndoshta kjo është pika që shqetëson më shumë drejtuesit kuqezinj. Pasi kanë ikur këta lojtarë, pronarët e shtëpive kanë gjetur shishe birrash dhe pijesh të tjera alkoolike, madje edhe prezervativë.
“Kam informacion se disa lojtarë i kanë lënë shtëpitë në mënyrë të çrregullt dhe u janë gjetur në shtëpi edhe pije alkoolike pa fund. Nuk mund të tallen dot me Flamurtarin ata. Do të ketë masa ndaj tyre për prishje të imazhit të klubit”, u shpreh shkurtimisht administratori për gazetën Panorama.
Masat – Drejtuesit e klubit janë të vendosur për të ndëshkuar lojtarët që kanë lënë shtëpitë në kushte të papërshtatshme. Mësohet se masat ndaj tyre do të jenë ekonomike dhe administrative. (Panorama)
