Pas helmimit të 18 personave në një restorant në zonën e ish-Bllokut në Tiranë, policia ka shoqëruar në komisariat menaxherin e këtij biznesi.
Ngjarja e rëndë ka ndodhur sot, kur 18 persona që u shtruan në QSUT janë helmuar nga salmonela.
Mësohet se ata janë jashtë rrezikut për jetën, ndërkohë që Autoriteti Kombëtar i Ushqimit ka bllokuar aktivitetin e biznesit deri në fund të hetimeve që po kryhen.
Menaxheri i shoqëruar nga policia do të merret në pyetje rreth kësaj ngjarje, për të dëshmuar mbi cilësinë e ushqimit që serviret në restorantin e njohur në zonën e ish-Bllokut. Emri i biznesit nuk bëhet me dije për shkak të hetimeve që janë në zhvillim.
