Një denoncim jo i zakonshëm është publikuar sot, ku një ish-oficer i forcave “Shqiponja” denoncon ish-shefin e tij për kërcënime. Ai e lidh kërcënimin me ngjarjet e Lazaratit dhe thotë se atje ka pasur një konflikt me ish-shefin e tij për të cilin ka bërë edhe denoncim. Por pasi e ka njohur me këtë problem ministrin e Brendshëm, është pushuar menjëherë nga puna.
Ai i ka shkruar portalit “Jeta osh qef” ku ka treguar gjithë historinë dhe se pas pushimit nga puna, i kanë dalë nga para tij dy persona me armë dhe kapele dhe e kanë kërcënuar duke i thënë se ka shkaktuar shumë probleme dhe do e pësojë së bashku me familjen e tij.
Bashkim Lamçe shkruan më tej se i ka shkruar letër ministrit të Brendshëm për këtë problem, por përgjigja ka qenë pushimi i menjëhershëm nga puna.
“Përshëndetje Jetaoshqef, unë quhem Bashkim Lamce një ish-punonjës policie i repartit (SHQIPONJA). Desha të bëja një denoncim publik te ju pasi këto ditë kam marrë një kërcënim në lidhje me jetën time dhe familjarëve tëmi. Isha duke dale nga garazhi kur para meje shfaqen dy persona me kapele dhe njeri nga këta persona mbante një armë në dorë. Këta persona mu drejtuan duke më thënë: ke shkaktuar shumë probleme kështu që do ta pësosh ti bashkë me familjen tende. Dua ta bëj publik këtë denoncim pasi unë nuk kam probleme me njeri dhe kjo gjë me ka ardhur nga puna që unë kam pasur. Dua të theksoj se para se të largohesha nga puna kam pasur një konflikt me eprorin tim ku sa ka arritur dhe të më kërcënojë me jetë në krye të detyrës. Unë kam ndjekur rrugën ligjore duke bërë njëherë kallëzimin në SHKB për problemin që kisha dhe më pas i jam drejtuar me letër ministrit të Brendshëm dhe drejtorit të përgjithshëm në pritje të zgjidhjes se problemit. Dhe në fund mora si përgjigje je i pushuar nga puna. Për këtë arsye doja ta bëja publik kërcënimin tim pasi nuk kam më besim te policia e shtetit. Ju falënderoj”, ka qenë ky rrëfimi i tij.
I pyetur më tej për konfliktin me eprorin ai ka thënë se ka ndodhur pas aksionit në Lazarat.
“Konflikti im me eprorin ka ndodhur në Lazarat ku dhe ky konflikt është shoqëruar me kallëzim siç dhe kam shkruar me sipër, sa për emrin unë mendoj se nuk është mirë ta përmendim, unë po të them që emri i tij është përmendur edhe nga Basha në opinion”, tha Lamçe.
Konflikti sipas tij ka lindur pas disa komenteve në internet, ku më pas ka marrë edhe kërcënime.
“Kuptohet jeta osh qef pasi në atë kohë ka qenë goditja dhe asgjësimi i lëndëve narkotike nga ana jonë dhe disave ju janë sytë ato ditë dhe ishin të gatshëm për çfarëdolloj gjeje vetëm të ishin të qetë. Po dhe e kam kallëzimin në prokurori në Gjirokastër po për më shumë detaje unë do i bëj letrat publike ta di që po me vjen nga ky person kërcënimi. Dyshoj pasi siç thashë kam punuar 6 vjet inspektor policie dhe konfliktin më të forte me këtë e kam pasur. Mbasi më kanë larguar nga policia unë vazhdoj një jetë të qetë dhe pa probleme.
Mbasi kjo me erdhi mbasi unë kam bërë disa komente nëpër rrjete sociale ku dhe kam përmendur emra. Pasi i shkruajta Tahirit, mora pushimin nga puna. Mbas dy vjetësh sorollatje që nuk ma hapte njeri derën më në fund më dha të drejtë gjykata administrative e apelit ku dhe të paktën jam pak i qetë nga kjo pjesë”, tha Bashkim Lamçe.
