Kryeministri Edi Rama ka përshëndetur aksionin e forcave speciale të policisë, që më herët gjatë kësaj të premteje, të maskuar, mësynë në banesat e tre gjyqtarëve që dhanë vendimin për Dritan Dajtin.
“Faleminderit me një përulje të thellë shërbëtorëve të shtetit që thyen mitin 30 vjeçar të paprekshmërisë absolute të kriminelëve me toga të zeza. Duke u treguar vrasësve të drejtësisë për 4 policët e vrarë se koha e të paprekshmëve po mbaron,shteti sot ka hyrë në një fazë të re”, shkruan Rama në Twitter.
Më herët, Policia e Shtetit konfirmoi aksionin e ndërmarrë nga forcat speciale, “në zbatim të urdhrit nr. 89, datë 14 shkurt 2019, të Gjykatës së Shkallës së Parë për Krime të Rënda, për të ushtruar kontroll në banesat e tre gjyqtarëve, të cilët zbutën dënimin e Dritan Dajtit”.
Deri tani janë gjetur një sasi municioni, mijëra euro dhe prova të tjera, të cilat do të administrohen nga organet ligjzbatuese”, njoftoi Policia. /Boldnews.al/
