“Save the Children”, ka publikuar një raport të ri ku rezulton se një në pesë fëmijë jetojnë në zonat që janë të prekura nga konflikte të armatosura dhe luftra.
Fëmijët kanë qenë më të rrezikuar nga konfliktet në Afganistan, Jemen, Republikën e Afrikës Qendrore, Republikën Demokratike të Kongos, Siri, Irak, Mali, Nigeri dhe Somali.
Rreth 420 milionë fëmijë jetonin në zona konfliktesh në vitin 2017, duke shënuar kështu një numrin më të madh të fëmijëve të rrezikuar nga luftërat në të paktën 20 vitet e shkuara.
Raporti i “Save the Children” nënvizon se një arsye përse është shënuar kjo rritje e numrit të fëmijëve që jetojnë në zonat e konflikteve është se lufta moderne ka ndryshuar vijat e frontit me luftimet në zonat urbane, në mes të popullatës civile, që janë gjithnjë e më të shpeshta dhe me mosrespektimin e rregullave ndërkombëtare.
