Nga Boldnews.al
Puna kryesore e strukturave të rendit është evidentimi dhe ndalimi i personave të dyshuar apo akuzuar për veprimtari kriminale, por në deklaratën e fundit të Policisë së Shtetit thuhet se kanë të dhëna se persona të dënuar, apo me precedentë penal po përgatiten të ushtrojnë dhunë në protestën e opozitës.
“Përveç deklaratave dhe retorikës së ndezur politike dhe thirrjeve për dhunë, të artikuluara nga disa përfaqësues të politikës dhe medias, Policia e Shtetit ka administruar edhe informacione se persona të caktuar, me rekorde kriminale apo të dënuar më parë për vepra të rënda penale, janë përgatitur për të ushtruar dhunë në protestën e datës 16 shkurt 2019, të organizuar nga Partia Demokratike”-thuhet në reagimin e Policisë së Shtetit.
Pyetja që ngrihet është se përse nuk i ndalon policia këta persona të cilët sipas saj po përgatiten për akte dhune? Misioni i saj nuk është vetëm arrestimi apo ndalimi në kushtet e flagrancës, pasi edhe përgatitja për kryerjen e akteve të mundshme kriminale konsiderohet vepër penale e mbetur në tentativë.
Deri më tani nuk ka asnjë person të shoqëruar për dyshimet e policisë, ndërsa më shumë deklarata ngjan një formë për të minimizuar pjesëmarrjen e protestuesve dhe duke ushqyer frikën për trazira të mundshme.
Edhe fakti që nuk i është dhënë leja opozitës për të protestuar përgjatë kryeministrisë përbën një tjetër motiv dukshëm të qëllimshëm. Në këtë mënyrë do kenë një shkak për të nisur procedimin penal për “tubim të paligjshëm” ndaj organizatorëve të protestës.
Skenari mbetet i qartë që strukturat e rendit po luajnë politikisht, qëllimi i vetëm i së cilës është që me deklarata bombastike, shpesh të papërgjegjshme, synon që të frikësojë qytetarët për të mos marrë pjesë në protestë.
