Nikola Zaniolo është kthyer në një lider të Romës. Është vetëm 19 vjeç, por lojtari i Romës po thyen rekorde dita ditës me performancat e tij të jashtëzakonshme. Në mbrëmjen e së martës në Ligën e Kampionëve ai realizoi një dygolësh përballë Portos, që i dha fitoren kryeqytetasve me rezultatin 2-1. Me këto gola ai vendosi emrin e tij në historinë e verdhekuqëve.
Zaniolo realizoi me 2 goditjet e para në portë dhe njëkohësisht u bë lojtari më i ri i Romës që realizon në ndeshje me eleminim direkt. Një tjetër rekord që ai mbarti ishte se u bë gjithashtu edhe italiani më i ri që realizon 2 gola në një sfidë të Championsit. Zaniolo ishte 19 vjeç e 225 ditë, ndërkohë që Pietro Paolo Virdis, kishte qenë 20 vjeç e 129 ditë, kur e mbante këtë rekord në 1977 me Juventusin.
Që kur trofeu ndërroi emër, pra u quajt Liga e Kampionëve, kjo statistikë zotërohej nga trajneri aktual i kombëtares sonë, Kristian Panuçi, i cili ishte 21 vjeç e 204 ditë kur shënoi 2 gola në Milan-AEK në 1994. Ishte pikërisht Zaniolo ai që e theu këtë rekord./BOLDNEWS.AL/
