Nga Boldnews.al
Ironi më të madhe nuk kishte teksa në sallën e Pallatit të Kongreseve rriheshin shuplakat për suksesin se: “Shqipëria nuk ka më kanabis”, në Kapshticë kapet 1 ton hashash, që kishte për destinacion Turqinë.
Sasia e madhe konfirmoi se raporti i asgjësimit të drogës, me atë të cilën arrin të kultivohet dhe lartësohet, është mjaft e madhe. Kjo vuri në dyshim edhe raportin shpresëdhënës të “Guardia Di Finanza” e cila me bindje të plotë doli në përfundimin se vendi ynë mund të konsiderohet “zonë e pastër” përsa i përket kultivimit të kanabisit.
Teksa politika qeveritare hidhte e priste statuse dhe tentoi të marrë meritat, lajmet që erdhën nga Kapshtica, po ditën e djeshme flisnin për sasi të madhe droge të kapur. Lënda narkotike ishte vendosur në disa thasë në kamionin e mbushur me krunde. Në pranga kanë përfunduar vetëm dy shoferët e kamionit, ndërsa nuk ka ende asnjë të dhënë mbi trafikantët e vërtetë, pronarët e drogës në Shqipëri dhe ata që e prisnin mallin në Greqi.
Për të siguruar 1 ton hashash në rastin më të mirë, nevojiten mbi 2 mijë bimë kanabis sativa. Ndërsa vetë policia në komunikimin zyrtar të ditës së djeshme u shpreh se përgjatë vitit 2018 janë asgjësuar rreth 36 mijë bimë kanabis sativa në të gjithë vendin. Raporti mes drogës së asgjësuar dhe asaj të kultivuar vijon të ketë hendek të madh.
Ndonëse pranohet se krahasur me shifrat e frikshme të epokës Tahiri të viteve 2016-2017, aktualisht kultivimi i kanabisit është ulur, përsëri sasia e konsiderueshme jo vetëm kultivohet, por ka kapur tregun vendas dhe Europian. Tashmë droga është mirëfilltas në duart e krimit të organizuar, duke “spostuar” fshatarët të cilët në vitet 2016-2017 edhe ata u munduan të bënin pak para nga histerizmi i kanabizimit.
Histerizmi qeveritar nuk kishte fund ditën e djeshme, ndërsa u rishfaq edhe ish-ministri i Brendshëm Fatmir Xhafaj, i cili mori meritat për suksesin e luftës kundër drogës gjatë vitit 2018.
Mesazhet e tij, në dukje të një “veterani lufte” që sheh të tjerë në triumfin e “çlirimit nga kanabisi” ishin qartësisht thumbuese ndaj të tijëve. “Me të njëjtët policë, buxhet, mjete, asistencë, në të njëjtin territor ndryshuam një realitet e krijuam model të krahasueshëm me Europën! Fuqia e vlera qëndron te njerëzit, reformat e mëdha që PS ideoi e udhëheq për të ndërtuar shtet e drejtësi në vend!”, komentoi dje Xhafaj.
Qëndrimi i tij më shumë shkonte drejt kryeministrit Rama dhe ish-ministrit të Brendshëm Saimir Tahiri. Ky i fundit nuk pati asnjë reagim, pasi i duhet të mendojë si të shpëtojë nga katër akuza të rënda, mes së cilëve trafiku ndërkombëtar i lëndëve narkotike në kuadër të grupit të strukturuar kriminal.
Me shifrat pompoze të drogës së asgjësuar nga policia dhe asaj që trafikohet kërkohen “profesionistë politik” që të fshehin të vërtetën, pasi drogë ka…
