Mançester Junajtid duket i destinuar të eliminohet për sezonin e dytë radhazi nga 1/8-at e Ligës së Kampioneve pas fitores 2-0 të PSG-së në ndeshjen e parë në “Old Trafford”.
Francezët i shkaktuan humbjen e parë Ole Gunar Solskjaerit në stolin e “djajve të kuq” dhe statistikisht anglezët bënë edhe ndeshjen më të dobët me norvegjezin në stol, madje edhe më të dobëtën krahasuar me shifrat që arrinte paraardhësi i tij Zhoze Murinjo në “Old Trafford” në këtë kompeticion.
Me portugezin në stol, Junajtid bënte me shumë pasime mesatarisht për ndeshje dhe e mbajti më tepër topin në ndeshjet kundër Juventusit, Valencias dhe Jang Bojsave në fazën e grupeve këtë sezon. Djemtë e Solskjaerit bënë 448 pasime kundër PSGsë në krahasim me 513 që bënin me ish-trajnerin e Çelsit, ndërkohë që edhe zotërimin e topit e patën 44%, në krahasim me 52% që e kishte “Speciali One”.
Megjithatë, Mançesteri luajti shumë më mirë përballë rivalëve francezë këtë sezon sesa bënë kundër Sevijes në këtë fazë të sezonit të shkuar. Skuadra spanjolle heshti “Teatrin e Ëndrrave” kur fituan 2-1 dhe i eliminuan nga Europa, ndërkohë që në total regjistruan 25 goditje drejt portës së De Geas. Junajtid e zotëroi më shumë topin, bëri më tepër goditje në portë dhe pasime kundër PSGsë, sesa Murinjo kundër andaluzianëve
Klubi spanjoll e shënjestroi 8 herë portën e anglezëve ndaj 3 goditjeve të PSG së, por në të dyja takimet “djajtë e kuq” e goditën vetëm një herë portën. “Murinjo do të kishte bërë më mirë, për të qenë të sinqertë”, shkruanin të zhgënjyer tifozët në “Twitter” pas humbjes së të martës.
“Murinjo ishte më i mirë, Ole të largohet”, shkruante një tjetër. Mjaftoi një humbje dhe të pakënaqurit e parë dolën në sipërfaqe: “E dashuroj Olenë, por nuk kam dyshim që Murinjo do ta kishte përgatitur skuadrën shumë më mirë për një ndeshje të këtij kalibri. U sfumuam totalisht nga një skuadër më e dobët brenda në shtëpi. Do kishim qenë më mirë me Murinjon në stol sonte”
