Sot në mbrëmje në orën 21:00 luhet ndeshja e e 1/8 të Uefa Champions League, Ajax – Real Madrid, dy klube që kanë shkruar historinë e futbollit dhe kanë bërë epokë në këtë kompeticion. Në fushën e blertë do të zbresin 17 Champions, 13 të ekipit madrilen dhe 4 të ekipit hollandez.
Pavarësisht historisë, për momentin diferencat mes dy ekipeve janë të mëdha.
Forca e madhe e Realit është në aspektin ekonomik. Ekipi “galaktik” arkëton 750 milionë euro në vit, ndërsa ai holandez vetëm 91 milionë: një diferencë 659 milionë euro. Ka një aspekt ku Ajaksi është më përpara Realit, bëhet fjalë për shpërndarjen e talenteve në Europë dhe aktivizimet e tyre në skuadra të ndryshme.
Ekipi spanjoll duhet të bëjë kujdes, sepse holandezët janë të motivuar dhe me besim për të gjetur lavdinë në Europë. Sot në stadiumin “Johan Krujf” (21:00) do të ketë spektakël. Pavarësisht se luhet në Holandë, madrilenët janë ekipi favorit për ta fituar këtë sfidë. Triumfi i “galaktikëve” kuotohet 1.9, i vendësve 3.8, ndërsa barazimi 4.2.
STATISTIKA
* Ajaksi ka arritur në raundin e 1/8-ave për herë të parë pas sezonit 2005-2006. Ekipi holandez i ka humbur 6 ndeshjet e fundit ndaj Realit të Madridit duke pësuar 20 gola dhe duke shënuar vetëm 2.
* Nga ana tjetër, skuadra spanjolle kërkon të vazhdojë ecurinë në këtë fazë të Champions-it. “Galaktikët” kanë siguruar 1/8-at që prej sezonit 2003-2004 dhe nuk kanë dështuar të kualifikohen në 9 vitet e fundit.
* Reali i Madridit ka fituar 3 herë radhazi Ligën e Kampionëve dhe 9 herë ndeshjet vajtje-ardhje të këtij kompeticioni, që nga humbja e fundit kundër Juventusit në sezonin 2014-2015.
* Dy ekipet janë përballur 12 herë me njëra-tjetrën në kompeticionet e UEFA-s. Reali ka fituar 7 ndeshje, Ajaksi 4 dhe një ka përfunduar në barazim 1-1 në Amsterdam.
* Ndeshja e fundit e Ajaksit në këtë fazë të kompeticionit është luajtur ndaj Interit. Holandezët barazuan 2-2 në ndeshjen e parë në shtëpi dhe humbën 1-0 në Milano.
* Për të gjetur çerekfinalet e fundit të Ajaksit në Ligën e Kampionëve duhet të rikthehemi në sezonin 2002-2003 kur e eliminoi Milani.
* Reali ka fituar 5 nga 6 ndeshjet e fundit të luajtura në Holandë. Në vitin 1995 humbi ndaj Ajaksit, skuadër, e cila fitoi Champions-in.
* Disa nga lojtarët më të njohur që kanë luajtur me të dyja skuadrat janë: Klarens Sedorf, Uesli Shnajder, Van Der Vart, Huntelar, etj
