Detaje të reja bëhem me dije lidhur me 32-vjeçarin nga Kosova i shpallur në kërkim nga Interpoli, i cili u arrestua sot nga policia në Vlorë, pasi rezulton i dënuar për pjesëmarrje në grupe terroriste.
“Gjykata Themelore e Prishtinës, ka lëshuar urdhrin e kërkimit më datë 26.01.2018 kundrejt shtetasit F.D, për vendosjen e masës së sigurisë “Arrest në burg” për veprën penale “Organizim dhe pjesëmarrje në grupe terroriste” sipas Kodit Penal të Republikës së Kosovës”, sqaroi policia e Vlorës.
I arrestuari rezulton të jetë dënuar me vendim të formës së prerë dhe njëkohësisht i kërkuar prej muajsh në Kosovë ku është thirrur si dëshmitarë në një gjyq për akuza të terrorizmit.
Policia njoftoi se ai është arrestuar “në kushtet e flagrancës në Portin e Vlorës pasi ka tentuar të dalë nga Republika e Shqipërisë duke përdorur pasaportë të falsifikuar maqedonase të lëshuar në 2018”.
Sipas raportimeve të kallxo.com i arrestuari në Vlorë është thirrur si dëshmitarë në gjyqin ndaj Gazmend Halitit, por ai nuk është paraqitur për të dëshmuar që prej janarit të vitit që shkoi. I arrestuari rezulton të jetë dënuar nga Gjykata Themelore e Prishtinës në Janar 2017.
Dhjetëra shqiptarë të Kosovës e Shqipërisë iu bashkua ISIS dhe grupeve të tjera ndërluftuese në Siri pas shpërthimit të luftës civile atje. Një pjesë humbën jetën në luftime, ndërsa disa prej të kthyerve dhe persona të akuzuar për organizim dhe rekrutim të tyre janë dënuar në të dy vendet me burg.
