Kryeministri i Kosovës, Ramush Haradinaj ka bërë një deklaratë të fortë kundër Federica Mogherinit, përfaqësueses së lartë të BE-së për Punët e Jashtme dhe Sigurinë.
Gjatë një interviste për emisionin ‘Tempora’ të Sonila Meços, Haradinaj u shpreh se Mogherini ka devijuar nga qëllimi i dialogut Kosovë-Serbi, një dialog që do të sillte njohjen reciproke midis dy vendeve, por ajo e ka çuar dialogun në pikën e shkëmbimit të territoreve. Sipas kryeministrit të Kosovës, kjo gjë e bën Mogherinin armike të synimeve të Kosovës.
‘Ata që prekin 17 shkurtin 2008, janë agresor ndaj sovranitetit të Kosovës. Të vetmit që e vendosin në pikëpyetje sovranitetin territorial të Kosovës, janë ata që nga Kosova, Serbia, edhe nga Tirana zyrtare në momente të caktuara, lobojnë për një shumicë deklaratash kontradiktore në Washington.
Kosova ekziston, është vend më vete, i pavarur, nuk ekziston prej Mogherinin. Ajo e ka devijuar dialogun në shkëmbim territoresh dhe për këtë arsye ajo është shndërruar armike e vendit tim. Ajo i ka bërë një dëm BE-së dhe na ka kthyer mbrapa’, ka thënë kryeministri Haradinaj.
