Prishtina dhe Ferronikeli nuk do të marrin pjesë në garat ndërkombëtare këtë sezon. Ky vendim i UEFA-s vjen për shkak të moslicencimit të tyre.
Burime të ‘Gazetës Olle’ kanë bërë të ditur se asnjëri klub nuk i plotëson kriteret për pjesëmarrje në Ligën e Kampionëve dhe në Ligën e Evropës, dhe për këtë arsye ka gjasa që asnjëra skuadër të mos marrë pjesë në këto gara.
Edhe pse UEFA nuk i pranoi në garat ndërkombëtare, kampionin Feronikeli dhe fituesin e Kupës, Prishtina, për shkak të mosplotësimit të kushteve, shtëpia e futbollit evropian, të paktën pritet t’i ngushëllojë me shpërblim.
Artan Berisha, drejtor i Feronikelit, thekson se zyrtari i UEFA-s, që e ka kontaktuar, ia ka bërë me dije që do të ketë shpërblime.
“Unë personalisht kam folur me të dhe ai më ka thënë se do të ketë shpërblime. Por, për vlerën e saj, sipas tij, do të vendos Komiteti Ekzekutiv i UEFA-s”, deklaroi Berisha për “GazetaOlle.com”.
Si kampion, Feronikelit do të duhej t’i takonin 250 mijë euro, por do të humb 200 mijë eurot tjera, për pjesëmarrje në rrethin e parë.
Në anën tjetër, Prishtinës do të duhej t’i takonin 200 mijë euro, si fituese e Kupës.
