Kryeministri Edi Rama dhe ministrja për Parlamentin, Elisa Spiropali, janë vendosur në qendër të kritikave të opinionit publik pas publikimit të videos ku identifikohej familja e vajzës së abuzuar seksualisht në Kavajë.
Në postimin e tij në Twitter gazetarët nuk kanë nguruar të replikojnë me Ramën.
Fotografi Felix Bilani ka replikuar në postimin ku kritikon median, duke e konsideruar shërbëtor të Erion Veliajt, kryebashkiak të Tiranës, dhe të ‘G99’, ish-partia e krijuar nga drejtuesit e ‘Mjaft’.
“Po ty të ka bo Lali Eri shërbetor, me vlerë më pak se lecka e derës… po të merr çdo pushtet duke zaptuar Tironën çdo ditë. Je kthyer në një shërbëtor të G99”, i shkruan Bilani.
Më herët, kreu i qeverisë ka kritikuar mediat në vend për mosrespektim të privacisë në zbardhjen e ngjarjes së përdhunimit në Kavajë, por postimi i tij me videon e ministres Spiropali, ka shkaktuar debate në rrjetet sociale.
Komente dhe reagime ka pasur edhe gazetarë të tjerë të cilët e kanë konsideruar të palogjikshme akuzën e kryeministrit, ndërkohë që është vetë qeveria që ka abuzuar me imazhet dhe privacinë e personave të përfshirë në këtë ngjarje. /Boldnews.al/
